Ҳусни Муборак ҳарбий шон-шараф билан дафн этилади

Мисрнинг собиқ президенти Ҳусни Муборакнинг дафн маросими ҳарбий шон-шараф билан ўтказилади. Бу ҳақда собиқ давлат раҳбарининг адвокати Фарид ад-Диб маълум қилди, деб ёзмоқда «РИА Новости».

Ҳусни Муборак 25 февраль куни Қоҳирада 91 ёшида вафот этди. Миср ҳукумати мамлакат собиқ президентининг вафоти муносабати билан 26 февралдан эътиборан уч кунлик мотам эълон қилди.

«Собиқ президент Муборакни дафн этиш маросими президент Абдул Фаттоҳ ас-Сисининг буйруғига асосан ҳарбий шон-шараф билан ўтказилади», — деб маълум қилган адвокат.

Унинг сўзларига кўра, дафн маросими 26 февраль куни бўлиб ўтади, аммо маросим юқори мартабали сиёсатчилар ташрифи сабабли кечиктирилиши мумкин. Хабар берилишича, Қоҳира халқаро аэропортида юқори мартабали чет эллик меҳмонларни қабул қилишга тайёрлик кўрилмоқда.

Маълум қилинишича, Ҳусни Муборак 25 февраль куни маҳаллий вақт билан 11:20 да вафот этган. Шифокорнинг уни қутқариш учун барча уринишлари муваффақиятсиз бўлган.

Жорий йилнинг январь ойи охирида собиқ президент ошқозонидаги ўсимтани олдириб ташлаш бўйича жарроҳлик амалиётини бошдан кечиргани маълум бўлган эди. Ўшанда Ҳусни Муборак интенсив терапия бўлимида даволанаётгани таъкидланган эди.

Ҳусни Муборак 1981 йилдан 2011 йилга қадар — 30 йил давомида Мисрга раҳбарлик қилган. 2011 йил февралида, оммавий норозилик намойишлари тўлқинидан сўнг, намойишчиларнинг талабларини қондирган ҳолда, президентликдан истеъфо берган эди.

Шундан сўнг мамлакатнинг собиқ раҳбари коррупция ва намойишчиларни ўлдиришда айбланиб, қамоққа олинган эди. Муборак олти йил умрини панжара ортида ўтказди, 2017 йили озодликка чиқарилган эди. У Қоҳиранинг Гелиополис туманидаги данғиллама уйида оиласи билан бирга яшаб келаётган эди.

Маълумот учун, Қоҳирадаги Ҳарбий-ҳаво кучлари академиясини битирган Ҳусни Муборак узоқ вақт учувчи бўлиб хизмат қилган, бир нечта урушда қатнашган. 1969 йилда у авиация генерали бўлган ва Миср ҳаво кучлари штаб бошлиғи этиб тайинланган ҳамда бу лавозимни 1972 йилгача эгаллаб турган. 1972 йилда Ҳусни Муборак Ҳарбий-ҳаво кучлари қўмондони ва шу билан бирга Миср мудофаа вазирининг ўринбосари этиб тайинланган. Ушбу лавозимда Муборак Ҳарбий-ҳаво кучларини қайта ташкил этган ҳамда 1973 йил октябрь ойида Синай яриморолидаги Исроил қўшинларининг позицияларига кутилмаган ҳужум режаси муаллифларидан бири бўлган. Мазкур операция натижасида Муборак авиация бош маршали унвонига, 1974 йилда эса Миср қуролли кучларининг генерал-лейтенанти унвонига сазовор бўлган.