Миср собиқ президенти Ҳусни Муборакнинг дафн маросими 26 февраль, чоршанба куни, Қоҳирада бўлиб ўтди. Бу ҳақда «РБК» хабар берди.
Мамлакат собиқ раҳбари билан видолашув маросими Миср пойтахти шарқидаги Ҳусайн Тантавий масжидида жаноза намози билан бошланди. Собиқ президентнинг жасади қўйилган тобут масжидга вертолёт билан етказилган. Унинг ўғиллари Алаа ва Гамал отаси билан видолашиш учун Мисрнинг олий даражали раҳбарияти ва собиқ президентнинг тарафдорлари билан келди. Масжид ҳудудида Миср армиясининг турли бўлинмалари соқчилари саф тортди. Аввалроқ Ҳусни Муборак ҳарбий шон-шараф билан дафн этилиши ҳақида хабар берилган эди.
Мавзуга доир: Ҳарбий, президент, маҳкум: Ҳусни Муборак тарихи
Маълум қилинишича, Ҳусни Муборак 25 февраль куни маҳаллий вақт билан соат 11:20 да вафот этган. Шифокорнинг уни қутқариш учун барча уринишлари муваффақиятсиз бўлган.
2020 йилнинг январь ойи охирида собиқ президент ошқозонидаги ўсимтани олдириб ташлаш бўйича жарроҳлик амалиётини бошдан кечиргани маълум бўлган эди. Ўшанда Ҳусни Муборак интенсив терапия бўлимида даволанаётгани таъкидланган эди.
Ҳусни Муборак 1981 йилдан 2011 йилга қадар — 30 йил давомида Мисрга раҳбарлик қилган. 2011 йил февралида, оммавий норозилик намойишлари тўлқинидан сўнг, намойишчиларнинг талабларини қондирган ҳолда, президентликдан истеъфо берган эди.
Шундан сўнг мамлакатнинг собиқ раҳбари коррупция ва намойишчиларни ўлдиришда айбланиб, қамоққа олинган эди. Муборак олти йил умрини панжара ортида ўтказди, 2017 йили озодликка чиқарилган эди. У Қоҳиранинг Гелиополис туманидаги данғиллама уйида оиласи билан бирга яшаб келаётган эди.
Маълумот учун, Қоҳирадаги Ҳарбий-ҳаво кучлари академиясини битирган Ҳусни Муборак узоқ вақт учувчи бўлиб хизмат қилган, бир нечта урушда қатнашган. 1969 йилда у авиация генерали бўлган ва Миср ҳаво кучлари штаб бошлиғи этиб тайинланган ҳамда бу лавозимни 1972 йилгача эгаллаб турган. 1972 йилда Ҳусни Муборак Ҳарбий-ҳаво кучлари қўмондони ва шу билан бирга Миср мудофаа вазирининг ўринбосари этиб тайинланган. Ушбу лавозимда Муборак Ҳарбий-ҳаво кучларини қайта ташкил этган ҳамда 1973 йил октябрь ойида Синай ярим оролидаги Исроил қўшинларининг позицияларига кутилмаган ҳужум режаси муаллифларидан бири бўлган. Мазкур операция натижасида Муборак авиация бош маршали унвонига, 1974 йилда эса Миср қуролли кучларининг генерал-лейтенанти унвонига сазовор бўлган.
Изоҳ (0)