Андижонда гиёҳвандлик воситаси сотувчи шахслар занжири узилди, деб хабар бермоқда ИИВ Тергов департаменти.
Хабарда айтилишича, 14 август куни соат 18:00 да Андижон шаҳри бўйича ИИО ФМБ ходимлари томонидан «Қорадори 2020» тадбири ўтказилган. Тадбир давомида шаҳарнинг Бобуршоҳ кўчасида жойлашган «Улфатлар» чойхонаси рўпарасида 20 ёшли Жавоҳир А., 0,81 грамм таркибида «тетрогидроканабинол» гиёҳванд воситасини сақловчи «гашиш» гиёҳванд моддасини 500 минг сўмга сотган вақтида ушланган.
Жавоҳир А. уни 35 ёшли Нодирбек А.дан 250 000 сўмга сотиб олганлигини маълум қилган. Унинг кўрсатмасига асосан Нодирбек А. ўзининг Spark’ида Лермонтов кўчасида кетаётганида тўхтатилиб, автомашина холислар иштирокида кўздан кечирилган. Текширувда машина олд чап томон эшигини ички чўнтагида турган сигарет қутисига солинган 1,15 грамм, автомашина ўнг олди томон оёқ қўйиш жойидан 1,92 грамм «гашиш» гиёҳванд моддаси ва унинг ёнидан тадбирда фойдаланган рақамланган 5000 сўмлик купюрадаги пуллардан 2 донаси борлиги аниқланиб, тегишли тартибда ҳужжатлаштириб олинган.
Нодирбек А. бу моддани таниши 39 ёшли Абдусалом М.дан 365 000 сўмга сотиб олганлигини маълум қилгач, тадбир давом эттирилган ва Абдусалом М. кийимлари холислар иштирокида кўздан кечирилганида, шимининг олди ўнг чўнтагига солинган сигарет қутиси ичидан полиэтилен пакетга ўралган 0,22 грамм ва чап оёғига ёпиштирилган полиэтилен парчасига ўралган 1,02 грамм «гашиш» гиёҳванд воситаси аниқланиб, келгусида текшириб кўришлик учун олинган.
Абдусалом М.дан ушбу гиёҳванд моддаларини кимдан олганлиги сўралганида, Жавоҳир А.,дан, Нодирбек А.,нинг автомашинасидан ва унинг ёнидан олинган жами 5.12 грамм кўп миқдордаги «гашиш» гиёҳванд моддасини фуқаро 54 ёшли Дилмурат А.дан жами 1.025.000 сўмга сотиб олганлигини маълум қилган.
Ушбу кўрсатмага асосан Дилмурод А.ни яшаб келаётган Андижон шаҳар Охунбобоев кўчасида уйини олдида тўхтатиб, кийим бошлари кўздан кечирилганида, ёнида жами 553 000 сўм пуллари борлиги, ушбу пуллар орасида тадбирда фойдаланган рақамланган 5000 сўм купюрадаги пуллардан 2 донаси борлиги аниқланиб, холислар иштирокида тегишли тартибда расмийлаштириб олинган.
Мазкур жиноят иши Андижон шаҳри бўйича ИИО ФМБ 3-сон ИИБ ҳузуридаги Тергов бўлинмаси томонидан Жавоҳир А.га нисбатан Жиноят кодексининг 273-моддаси 2-қисми (гиёҳвандлик воситаларини ўтказиш мақсадини кўзлаб қонунга хилоф равишда тайёрлаш, олиш, сақлаш ва бошқа ҳаракатлар қилиш, шунингдек, уларни қонунга хилоф равишда ўтказиш) билан, Нодирбек А., ва Абдусалом М.ларга нисбатан ЖКнинг 273-моддаси 3-қисми «б» банди билан ва Дилмурод А.га нисбатан ЖКнинг 273-моддаси 5-қисми (гиёҳвандлик воситаларини кўп миқдорда қонунга хилоф равишда сотиш) билан жиноят иши қўзғатилган.
Аввалроқ Тошкентда Malibu салонидан гиёҳванд модда топилгани, Бухорода салкам 1,5 килолик гиёҳванд моддани сотиш мақсадида сақлаб келаётган жиноий гуруҳ қўлга олингани, Яккабоғда 72 ёшли отахоннинг уйидан қарийб 2 кг гиёҳванд восита аниқлангани, Ўзбекистонга кириб келган поезддан салкам 173 килограмм наркотик топилгани ҳақида хабар берилганди.
Изоҳ (0)