Тошкент вилояти судининг апелляция инстанциясида андижонлик 32 ёшли маҳбусни уриб ўлдиришда айбланиб, жазога тортилган 12 нафар тергов ҳибсхона ходимларининг 10 нафари томонидан киритилган апелляция шикояти кўриб чиқилаётгани хабар берилганди. Мазкур суд жараёнида иштирок этган “Дарё” журналисти судда кўриниш берган марҳумнинг онаси ва судланганларнинг яқинларига микрофон тутди.
Суҳбатдошлардан бири, жумладан марҳумнинг онаси Юлдузхон Султонова 32 ёшли ўғли даҳшатли ўлим топганини айтаётган бўлса, судланувчиларнинг яқинлари жиноят ишлари бўйича Ангрен шаҳар судининг ҳукми адолатсиз бўлганини, ичкаридаги ИИБ ходимларининг айби йўқлигини айтмоқда.
Марҳум Санжарбек Мамажоновнинг онаси бўламан. Ўғлим ўталмай қолган муддатини ўташ учун 19 март куни (2022 йил — таҳририят изоҳи) тергов ҳибсхонасига олиб борилганди. Мен тергов ҳибсхонасидаги кузатув камераларидан бирини кўрдим. 20 март куни эса кечки пайт 22:45 да ўғлимни бир хонага олиб киришиб, ичида ким борлигини билмадим, салкам 4 соатда кўтариб олиб чиқишди.
Олиб чиққанлар орасида 5 та “мелиса” ходими бор экан. 20 мартдан 21 мартга ўтар кечаси ўғлимни қаергадир ташлашган, шу кечаси умуман қарашмаган. Хуллас, болам ваҳшийларча ўлдирилган. Соғ жойи қолмаган. Айбдорнинг кимлигини билмайман. Айбдорлар топилиб, жазо олишини сўрайман. Мен ҳам кимгадир туҳмат қилишдан қўрқаман, — дейди марҳумнинг онаси Юлдузхон Султонова.
Судланувчилардан бирининг яқини Раънохон Абдусаидова марҳумни “наркоман” деб атаб, у 6 ой Қарши шаҳридаги қамоқхонада жазо муддатини ўтагани, наркологияда даволаниб чиққанини айтиб, “уни балки дўхтирлар ургандир”, дейди.
Камерага тушган “мелиса”ни қамаб қўйиш ноҳақлик-да. Бошқа одам ўлдиряпти, лекин 15 нафар “мелиса”ни қамаб қўйишмоқда. Ўлган болани ҳам суриштиринг, олдин оддий “наркоман” бола бўлган экан. Марҳумнинг онаси пул талаб қилмоқда. Пул берилса-да, норози бўлиб устидан ёзмоқда, — дейди Раънохон Абдусаидова.
Шахсини очиқлашни истамаган судланувчиларнинг яқинларидан бири ички ишлар ходимлари фуқарони ўлдираман деган ниятда урмаслигини айтмоқда.
“Мелиса”лар ҳеч қачон урмайди. Мени қўлимда ўлади деб, ҳеч қачон урмайди. Наркотик истеъмол қилса, ўзи “псих” бўлса, қандай қилиб уни уриши мумкин? Ўлган одам ким бўлган, давлатга нима қилиб берган деган маълумотларни топиб, кейин чиқаринг, — дейди судланувчилардан бирининг хотини эканини айтаётган аёл.
15 йил ички ишлар тизимида фаолият юритган, айни пайтда судланувчи сифатида суднинг қора курсисида ўтирганлардан бирининг онасига кўра, унинг ўғли ҳатто марҳумни танимаган.
Бу ичкарида бўлган иш экан. Бир бола судда мен урдим, мен ўлдирдим деди. Лекин судда буни инобатга олишмади, — дейди судланувчининг онаси.
Эслатиб ўтамиз, Андижон вилоятининг Шаҳрихон туманида яшаган 32 ёшли С.М. 2022 йил 21 март куни ИИБ ходимлари ва бир нафар маҳкум томонидан қийноққа солиниши оқибатида тергов ҳибсхонасида вафот этганди. Суд марҳумнинг ўлимига сабабчи деб топган ИИВ ЖИЭДга қарашли 3-сон тергов ҳибсхонасида ишловчи 6 нафар ходимнинг ҳар бирини 1 йил 6 ой муддатга ички ишлар органлари тизимида ишлаш ҳуқуқидан маҳрум қилган ҳолда 4 йил муддатга озодликдан маҳрум қилганди. Шунингдек, қолган 6 нафар ходим эса 1 йил 6 ой муддатга ички ишлар органлари тизими ва шифокорлик лавозимларида ишлаш ҳуқуқидан маҳрум этилиб, 3 йилга озодликни чеклаш жазоси билан жазоланганди. Бундан ташқари, марҳум маҳбусни камерада калтаклаган маҳкум Ж.У.га 4 йил 1 ой муддатга озодликдан маҳрум қилиш жазоси тайинланган.
Изоҳ (0)