Сурхондарё вилояти ИИБ Хавфсиз туризмни таминлаш бошқармаси ходимлари томонидан 1 ноябрь куни Денов туманида олиб борилган тезкор тадбир давомида 8 минг долларлик гиёҳвандлик воситаси савдосига чек қўйилди. Бу ҳақда ИИВ матбуот хизмати хабар берди.
Денов туманида яшовчи, муқаддам судланган фуқаро Н. ҳудудида соф оғирлиги 732.49 грамм бўлган 200 дона гугурт қутига жойланган «Марихуана» гиёхвандлик моддасини 8 минг долларга сотаётган вақтида қўлга олинган.
Тезкор тадбир давом эттирилиб, Н.нинг уйи кўздан кечирилганида унинг уйидаги шкафидан 3,34 гр «Марихуана» гиёҳвандлик моддаси олиган.
Олиб борилган дастлабки суриштирув ишлари натижасида фуқаро Н. ушбу гиёҳвандлик моддасини Денов тумани Куёвсув маҳалласида яшовчи фуқаро А.дан олганлиги маълум бўлган.
Шундан сўнг, фуқаро А.нинг яшаш хонадони кўздан кечирилганида, унинг уйидан 194,09 гр «Марихуана» гиёҳвандлик моддаси борлиги аниқланган.
Мазкур ҳолат юзасидан Денов тумани ички ишлар органлари фаолиятини мувофиқлаштириш бошқармаси Тергов бўлими томонидан фуқаро Н. ва А.ларга нисбатан Жиноят кодексининг 273-моддаси (Гиёвандлик воситалари ёки психотроп моддаларни ўтказиш мақсадини кўзлаб қонунга хилоф равишда тайёрлаш, олиш, сақлаш ва бошқа ҳаракатлар қилиш, шунингдек уларни қонунга хилоф равишда ўтказиш) ва 25-моддалари (Жиноятга тайёргарлик кўриш ва жиноят содир этишга суиқасд қилиш)нинг тегишли қисмлари билан жиноят иши қўзғатилган. Тергов ҳаракатлари олиб борилмоқда.
Изоҳ (0)