ИИВ Жиноят қидирув бош бошқармаси, Давлат божхона қўмитаси, Сурхондарё вилояти ИИБ Жиноят қидирув бошқармаси Гиёҳвандлик моддаларини ноқонуний муомаласига қарши курашиш бўлими ҳамда вилоят Божхона бошқармаси ходимлари ҳамкорлигида ўтказилган тезкор тадбирда гиёҳванд моддалар савдоси билан шуғулланувчи шахс қўлга олинди. Бу ҳақда Сурхондарё вилояти ИИБ ахборот хизмати хабар берди.
Маълум қилинишича, Денов туманида яшовчи Бобо исмли шахс туман ҳудудида катта миқдорда гиёҳвандлик моддасининг ноқонуний муомаласи билан шуғулланаётгани ҳақида олинган маълумот асосида тезкор тадбир ўтказган.
25 май куни мазкур маълумот ва «Қорадори-2022» кенг қамровли профилактик тезкор тадбирига мижоз сифатида кирган икки нафар вазирлик Жиноят қидирув бош бошқармаси ходимлари 140 минг доллар эвазига И.Б. исмли шахсдан 20 килограмм опий гиёҳвандлик моддасини сотиб олиш учун Денов туманидаги кафеларнинг бирида учрашган.
Тезкор тадбирда И.Б. 20 килограмм опий гиёҳвандлик моддаси борлиги ва уни пулни кўргач, ишонч ҳосил қилиб, олиб келиб беришини маълум қилган. У 26 май куни соат 03:30 ларда Денов тумани ҳудудида моддаларини яшаш уйидан олиб, белгиланган жойга келаётган вақтида тадбир иштирокчилари томонидан қўлга олинган. И.Б.нинг ёнидан 20 та скотч ўрамга махсус қадоқланган модда ҳодиса жойида кечиктириб бўлмас ҳаракатлар ўтказиш вақтида очиб кўрилган ва унинг ичида қизғиш рангли, ўткир ҳидли опий гиёҳвандлик моддасига ўхшаш моддалар экани аниқланган.
Шундан сўнг ўрамлардаги гиёҳвандлик моддалари далилий ашё тариқасида холислар иштирокида процессуал тартибда расмийлаштириб олинган.
Мазкур ҳолат юзасидан фуқаро И.Б.га нисбатан Жиноят кодексининг 246-моддаси (контрабанда), 273-моддаси (гиёҳвандлик воситалари, уларнинг аналоглари ёки психотроп моддаларни ўтказиш мақсадини кўзлаб қонунга хилоф равишда тайёрлаш, олиш, сақлаш ва бошқа ҳаракатлар қилиш, шунингдек уларни қонунга хилоф равишда ўтказиш) 5-қисми билан жиноят иши қўзғатилган.
Аввалроқ Ўзбекистонда Тожикистондан келтирган гиёҳванд моддаларни сотиш билан шуғулланган шахслар қўлга олингани, Сурхондарёда хизмат ити вагон ғилдирагига яширилган 1,7 килограмм гиёҳванд моддаларни аниқлагани, Самарқандда Тожикистондан ичига гиёҳванд модда яшириб олиб ўтилган пропан газ баллони портлагани тўғрисида хабар берилганди.
Изоҳ (0)