Бухорода Афғонистон фуқароси томонидан сотиш мақсадида яширилган 54 килограмм опий гиёҳвандлик моддаси аниқланди. Бу ҳақда ИИВ матбуот хизмати хабар берди.
Қайд этилишича, 20 январь куни Тожикистон ИИВдан Афғонистон фуқароси 60 килограмм опий гиёҳвандлик моддасини 360 минг долларга баҳолаб, Бухоро вилоятида сотиш учун харидор излаётгани ҳақида маълумот олинган. Ушбу маълумотни текшириш учун ИИВ Жиноят қидирув бош бошқармаси ходимларидан иборат тезкор гуруҳ зудлик билан Бухоро шаҳрига сафарбар қилинган.
Тезкор гуруҳ Абу исмли шахс гиёҳванд моддаси намунасини Бухоро шаҳр Алпомиш кўчасида жойлашган меҳмонхона олдидаги тандирга яширганини ўрганган. 21 январь куни тезкор гуруҳ келишилган жойдан 39 грамм опий гиёҳвандлик воситаси ҳужжатлаштириб олиниб, воқеа жойида кузатув ишлари давом эттирилган.
Кузатув жойида ўзини шубҳали тутган шахс ушланган ва опий намунасини у жойлаштирганини тан олиб, модданинг қолган қисми уйида кўмиб қўйилганини маълум қилган. Шундан сўнг унинг уйи текширилганда дарвозахона бурчагига кўмиб қўйилган иккита алюмин идишга яширилган 54 килограмм опий моддаси ашёвий далил сифатида олинган.
Дастлабки суриштирув давомида гиёҳванд моддасини гумонланувчига олдиндан таниш бўлган Афғонистон фуқароси 14 январь куни 13 тонна картошка орасида Бухорода сотиш учун етказиб бергани, моддаларни сақлаши эвазига ҳар бир килоси учун 500 доллардан беришни ваъда қилгани аниқланган. У келишилган маҳсулотни олиб кетиш учун харидор юборишини айтган.
Айни вақтда мазкур ҳолат юзасидан Бухоро вилояти ИИБ томонидан терговга қадар текширув ҳарактлари олиб борилмоқда.
Аввалроқ Тошкент вилоятининг Тошкент туманида 77 килограммдан ортиқ опий ва гашишни картошка кўринишида яширган наркокурьерлар ушлангани, Янгийўл шаҳридаги хонадондан 45 килограмм марихуана топилгани ҳақида хабар берилган эди.
Изоҳ (0)