Россия АҚШнинг 398 нафар конгрессменини «қора рўйхат»га киритди

Россия АҚШнинг Давлат думаси депутатларига нисбатан қўллаган санкцияларига жавобан Конгресс вакиллар палатасининг 398 нафар аъзосига санкциялар жорий қилди.

«Қайд этилган шахслар, хусусан, АҚШ Конгресси қуйи палатасининг раҳбарияти ва қўмиталар раислари доимий асосда Россия «стоп-листи»га киритилди. Қонунчилик органининг бошқа вакилларига ҳам спикер Нэнси Пелоси каби Россия Федерацияси ҳудудига кириши тақиқланди, Вашингтон санкцияларига жавобан АҚШнинг конгрессменларига бу каби тақиқлар қўлланилди», — дейилади вазирлик баёнотида. АҚШ вакиллар палатасида жами 435 нафар конгрессмен фаолият олиб боради.

Шунингдек, Канада парламентининг 87 нафар сенаторига ҳам АҚШ конгрессменларига қўлланилган санкцияларнинг муқобили жорий этилган, мазкур қарорга Оттаванинг россиялик барча сенаторларни «қора рўйхат»га киритгани сабаб бўлган. Канада парламентининг сенатида жами 105 ўрин мавжуд.

«Канада ташқи сиёсатидаги узоқни кўзламай қилинган ҳаракат мамлакатнинг ўзига ва Россия билан муносабатларга зиён келтиради, Москва Оттаванинг мазкур чораларига муносиб жавоб қайтаради», — дейилган Россия ТИВ баёнотида.

АҚШ россиялик депутатларга қарши бир неча босқичдан иборат санкциялар қўллаган. 11 мартда Федерал мажлиснинг 12 нафар аъзосига, жумладан Коммунистик партия етакчиси Геннадий Зюганов ва Дума спикери Вячеслав Володинга тақиқлар жорий этилди. АҚШ давлат департаменти уларнинг Россия томонидан ДХР ва ЛХР мустақиллигини тан олиш ишларига раҳнамолик қилганини қайд этган. 24 март куни 328 нафар депутат, шу билан бирга Давлат думасининг ўзи алоҳида муассаса сифатида АҚШ санкцияларига учради. Шу тариқа АҚШ қора рўйхатларига камида 340 нафар депутат киритилди, Давлат думасидаги депутатлар ўрни 450 тани ташкил қилади (Жириновский вафотидан кейин бир ўрин вакант).

Канада эса 24 март куни Украина ҳудудий яхлитлиги, суверенитети ва мустақиллигига нисбатан қилинган зўравонликларга йўл қўйгани учун 160 нафар россиялик сенаторларга санкциялар киритган.