Криштиану Роналду тўп сураётган Саудиянинг “Ан-Насср” футбол клуби Х ижтимоий тармоғида жамоа бош мураббийи Луис Кастро истеъфога чиққанини маълум қилди.
Кастро 2023 йил июлида “Ан-Насср”ни қабул қилиб олган эди. Унинг қўл остида клуб атиги битта совринни қўлга киритди — жамоа 2023 йилда Араб Чемпионлар Лигаси ғолибига айланди.
Душанба куни жамоа Осиё Чемпионлар Лигасининг 1-тур учрашувида Ироқнинг “Ал-Шорта” клуби билан дуранг ўйнади. Август ойида Саудия Арабистони Суперкубоги финалида “Ан-Насср” “Ал-Ҳилол”дан йирик ҳисобда (1:4) мағлубиятга учради.
ОАВда тарқалган хабарларга кўра, Кастро ўрнини “Ан-Насср”да “Милан”нинг собиқ бош мураббийи Стефано Пиоли эгаллаши мумкин.
Аввалроқ Роналду Кастродан норозилигини билдиргани, раҳбариятдан Зинедин Зиданни мураббийликка тайинлашни талаб қилгани ҳақида маълумотлар пайдо бўлганди.
Бунгача Кастро Бразилиянинг “Ботафого”, Қатарнинг “Ал-Дуҳаил”, Украинанинг “Шахтёр” клубларига устозлик қилган.
Изоҳ (0)