Жо Байден — АҚШнинг янги президенти. Трамп эса мағлубиятни тан олмаяпти. Асосий маълумотлар

Жо Байден АҚШнинг янги президентига айланади, аммо Дональд Трамп ўз мағлубиятини тан олмаяпти, деб ёзади Meduza.

Америка ОАВлари Жо Байденнинг ғалабаси ҳақида эълон қилди. Энг йирик Америка матбуотлари — улар орасида демократларни ҳам, республикачиларни ҳам қўллаб-қувватлайдиганлари бор — Демократлар партиясидан номзод, собиқ вице-президент (Барак Обама давридаги) Жо Байден Пенсильванияда аксарият овозни қўлга киритганини эълон қилди. Бу штатдаги ғалаба Байденга сайловчилар коллегиясининг 20 та овозини беради, бу эса унга президент бўлиб сайланиш учун зарур бўлган 270 та овоз маррасидан ўзиш имконини беради.

Бюллетенларни ҳисоблаш Пенсильванияда ҳали давом этмоқда, яна тахминан 190 мингта бюллетенни санаш қолган. Аммо Америка матбуотида Байденни ғолиб деб эътироф этиш учун маълумот етарли. Телеканаллар ва ахборот агентликлари прогноз моделларига таянган ҳолда ғолибни эълон қиладиган математиклар ва таҳлилчилар жамоасини ёллайди. Ҳозир уларнинг фикрича, Пенсильванияда Трамп энди Байдендан ўзиб кета олмайди. Бундан аввалги кўплаб сайловлар тажрибалари кўрсатишича, прогнозчилар жамоаси адашмайди.

Дональд Трамп ўз мағлубиятини тан олмади. Сайловлар якунларини Виржинияда голф ўйнаб (у ерда ҳам Байден ғолиб бўлган, айтганча) кутаётган амалдаги АҚШ президенти рақибининг ғалабасини тан олмади. «Бу сайловлар якунланишига ҳали анча бор», — дейилади Трампнинг ОАВлар Байденнинг ғалабаси ҳақида эълон қилганидан кейин чиқарилган баёнотида. Трамп ваъда беришича, унинг штаби 9 ноябрь, душанба куниёқ суд жараёнларини бошлайди. «Америка халқи овозларнинг ҳаққоний ҳисобланишига эришмагунича мен тинчланмайман», — деди у.

Жо Байден ғалабасига шубҳа қилмаяпти. У Twitter’да барча америкаликлар, шу жумладан, унга овоз бермаганлар учун ҳам президент бўлишга ваъда берди, унга келтирилган ҳурмат учун миннатдорлик билдирди ва ишончни оқлашга ваъда берди. У ижтимоий тармоқлардаги статусини «сайланган АҚШ президенти» деб ўзгартирди.

Байден илк қутловларни қабул қилишни бошлади. Сайловлардаги ғалабаси билан Байден ва бўлғуси вице-президент Камала Ҳаррисни ижтимоий тармоқларда Буюк Британия бош вазири Борис Жонсон, Канада бош вазири Жастин Трюдо, Шотландия ҳукумати раҳбари Никола Стержен, Лондон мэри Садик Хан ва дунёнинг турли бурчакларидан бошқа сиёсатчилар ҳам, масалан, Зимбабве президенти Эммерсон Мнангагву табриклади.

Сайловларда ким ғолиб бўлганини аниқлаш учун қарийб уч кеча-кундуз керак бўлди. Овоз бериш 3 ноябрь куни бўлиб ўтди. Аммо коронавирус пандемияси туфайли 2020 йилда жуда кўплаб америкаликлар сайлов участкасига келмасдан, почта орқали овоз беришга қарор қилди. Почта орқали жўнатилган бюллетенларни кўриб чиқишга кўпроқ вақт кетади.

Байденнинг ғалабаси янада ишончлироқ бўлиши мумкин. Ҳозирча Аризона, Невада, Жоржия, Шимолий Каролина ва Аляска штатларидан якуний натижалар келгани йўқ. Фақат Аляскада ғолибни олдиндан аниқ айтиш мумкин, у ерда катта фарқ билан Трамп етакчилик қилмоқда. Шимолий Каролинада ҳам у устунликка эга. Қолган штатларнинг барчасида Байден кичик устунликка эга бўлиб қолмоқда.

Жо Байден 77 ёшда, у Американинг энг кекса президентига айланади, шунингдек, АҚШнинг иккинчи католик президенти бўлади (Жон Кеннедидан кейинги). Байден бир умр сиёсат билан шуғулланиб келмоқда: у 30 ёшида сенатор бўлган. Байден — сайловчилар томонидан берилган овозлар сони бўйича президентликка номзодлар орасида рекордчи (иккинчи ўринда эса — Дональд Трамп, шу сайловда у ўз кўрсаткичларини 2016 йилдагига нисбатан яхшилади).

Камала Ҳаррис АҚШ тарихидаги биринчи аёл вице-президентга айланади, шунингдек, этник ва ирқий озчиликдан чиққан биринчиси ҳам: унинг онасининг келиб чиқиши ҳиндистонлик, отасиники — ямайкалик.

Собиқ иттифоқ ва Россияга бир неча марта ташриф буюрган Байденни Путинга нисбатан кескин йўналиш тарафдори деб ҳисоблашади. Сайловлардан сал аввалроқ у Россияни «Америка учун асосий хавф» деб атаган эди. 2011 йил бошида, Россия президенти лавозимини Дмитрий Медведев эгаллаб турган вақтда, Байден Россия мухолифатчилари билан учрашиб, Путиннинг ўрнида бўлганида учинчи президентлик муддати учун даъвогарлик қилмаслигини айтганди. Бир неча йилдан кейин у Москвага ўша ташрифи чоғида Путиннинг ўзи билан кўришиб, унинг кўзларида қалбини кўра олмаганини айтганди, бунга жавобан Путин кулиб юбориб: «Биз бир-биримизни тушунамиз», — деганини айтиб берганди.