Россиянинг кенг кўламли босқинининг икки йиллиги муносабати билан Украина президенти Владимир Зеленский Гостомелдан аҳолига видеомурожаат қилди. Айнан Гостомел орқали Россия ҳарбийлари Киевга ҳужум қилишга тайёргарлик кўрган эди.
“Мен Гостомелдаман. “Киев ва Украинани уч кун ичида босиб олиш” худди шу ердан бошланиши керак эди. Бир жумла билан айтишимиз мумкин: икки йил олдин биз бу ерда душманни ўт очиб кутиб олдик, икки йилдан сўнг бу ерда дўстларимиз ва ҳамкорларимиз билан учрашяпмиз... Бу икки йил давомида босиб ўтган йўлимизни ҳамда 24 февраль ўша пайтдаги ва ҳозирги фарқни рамзий ва таъсирчан ифодалайди”, — деди Зеленский.
Кадрларда Украина президентининг Италия бош вазири Жорж Мелони, Канада бош вазири Жастин Трюдо, Европа комиссияси раҳбари Урсула фон дер Ляен ва Бельгия бош вазири Александр Де Кроо билан қандай учрашгани кўринган.
Зеленский Украина ғалабага 730 кунга яқин эканини ва ҳар бир украиналик билан ниҳоятда фахрланишини таъкидлади.
“Ҳар қандай оддий одам уруш тугашини хоҳлайди. Лекин ҳеч биримиз Украинамизнинг тугашига йўл қўймаймиз. Шунинг учун ҳам “уруш тугаши” сўзларига “ўз шартларимиз бўйича” жумласини қўшамиз. Шу учун “тинчлик” сўзи “адолатли” эшитилади. Келажакдаги тарихда “мустақил” сўзи “Украина” сўзи билан доимо бирга келади. Бунинг учун курашамиз. Аллақачон ҳаётимизнинг 730 куни ўтди ва ғалаба қозонамиз. Ҳаётимизнинг энг яхши кунида”, — деди Украина президенти.
Изоҳ (0)