Канада бош вазири Жастин Трюдо Исроилни Ғазо секторида аёллар, болалар ва гўдаклар ўлдирилишини тўхтатишга чақирди. Бу эса исроиллик ҳамкасбининг қарши реакциясига сабаб бўлди. Бу ҳақда The Times of Israel хабар берди.
Трюдо Ғазодаги юракни оғритувчи вазиятдан афсусдалигини билдириб, “адолатнинг баҳоси барча Фаластинлик тинч аҳолининг давом этаётган азоби бўлиши мумкин эмас”лигини таъкидлади.
“Ҳатто урушнинг ҳам қоидалари бор. Барча бегуноҳ инсонларнинг ҳаётлари тенг, исроилликларнинг ҳам, фаластинликларнинг ҳам”, — деди у.
Канада бош вазири Исроилни Ғазо секторида ҲАМАСга қарши курашда “максимал вазминликка” чақириб, дунё кузатётганини эслатди.
“Биз шифокорлар, тирик қолганларнинг оила аъзолари ва ота-онасидан айрилган болаларнинг кўрсатмаларини тинглаяпмиз. Дунё аёллар, болалар ва гўдаклар ўлдирилишига гувоҳ бўлмоқда. Буни тўхтатиш керак”, — деди у.
Исроил Трюдога жавоб қайтарди
Исроил бош вазири Биньямин Нетаньяху, “тинч аҳолини атайлаб нишонга олган Исроил эмас, балки Холокостдан кейин яҳудийларга нисбатан содир бўлган энг даҳшатли воқеада тинч аҳолининг бошини кесган, ёқиб юборган ва қирғин қилган ҲАМАС” эканини айтди.
“Исроил тинч аҳолини хавф-хатардан ҳимоя қилиш учун ҳамма нарсани қилмоқда, ҲАМАС эса аксинча. Исроил Ғазодаги тинч аҳолини гуманитар йўлаклар ва хавфсиз зоналар билан таъминлайди, ҲАМАС эса уларнинг қурол билан чиқиб кетишига йўл қўймайди. Исроил эмас, ҲАМАС икки томонлама уруш жинояти — тинч аҳоли орқасида яширинган ҳолда тинч аҳолини нишонга олиш учун жавобгарликка тортилиши керак”, — деди Исроил бош вазири.
Шунингдек, Нетаняху “цивилизация кучлари ҲАМАС ваҳшийлигини енгишда Исроилни қўллаб-қувватлаши керак”лигини даъво қилди.
Франция президенти ҳам Исроилни аёллар ва болаларни ўлдирмасликка чақирганди
Макроннинг таъкидлашича, Франция ҲАМАСнинг террорчилик ҳаракатларини аниқ қоралайди, бироқ Исроилнинг ўзини ҳимоя қилиш ҳуқуқини тан олиб, уни Ғазодаги бомбардимонларни тўхтатишга чақиради. Исроил бош вазири Биньямин Нетаньяхунинг идораси Макроннинг баёнотига тезда жавоб бериб, давлатлар Исроилни эмас, ҲАМАСни қоралаши кераклигини айтганди.
“Тинч аҳолига етказилган ҳар қандай зарар учун жавобгарлик Исроил эмас, ҲАМАС зиммасига юклатилади”, — деган Нетаняху.
Елисей саройида журналистлар билан суҳбатлашган Макроннинг сўзларига кўра, Ғазо секторини бомбардимон қилиш учун “ҳеч қандай асос” йўқ ва ўт очишни тўхтатиш “Исроилга фойда келтиради”.
Изоҳ (0)