Украина президенти Владимир Зеленский ОАВ вакиллари билан суҳбатлашди. Унинг сўзларига кўра, Швейцарияда бўлиб ўтадиган тинчлик саммитида Ғарбдан энергия хавфсизлиги ва ядровий иншоотлар хавфсизлиги кафолатларини олишга умид қилмоқда. Украина президенти эркин навигация учун шароит яратилишини ҳам кутмоқда.
“Биз энергия хавфсизлигини, жумладан, ядровий хавфсизликни олишни истаймиз. Чунки мен бу борада ҳамма манфаатдор эканлигига ишонаман ва бу бизга яна бир қишга режа тузиш имкониятини бериши мумкин”, — деди Зеленский. Украина президентининг қўшимча қилишича, Россия мамлакат портларига ҳужум қилмоқда.
Владимир Зеленскийнинг сўзларига кўра, у Россия қўшинларини Украина ҳудудидан олиб чиқиб кетиш режасини ҳам ишлаб чиқишга умид қилмоқда. Бунда имкон қадар кўпроқ давлатлар иштирок этиши кераклигини таъкидлади.
Швейцариядаги конференция 15—16 июнь кунларига мўлжалланган. Таклиф этилган 160 та давлатдан 50 таси иштирок этишини тасдиқлади. Швейцариянинг RTS телеканалига кўра, Еврокомиссия раҳбари Урсула фон дер Ляен, Европа кенгаши президенти Шарль Мишель, Германия канцлери Олаф Шольц, Италия бош вазири Жоржия Мелони ва Канада бош вазири Жастин Трюдо иштирок этишларини тасдиқлаган.
Россия саммитга таклифнома олмади. Швейцария ТИВ маълумотларига кўра, бунга Москванинг тадбирга қизиқиш билдирмагани сабаб бўлган. Бунгача Кремль Россия саммитда иштирок этишдан манфаатдор эмаслигини бир неча бор таъкидлаган эди. Украина Россия делегациясининг иштирок этишига қарши чиқди.
Изоҳ (0)