Модель, журналист, хонанда — карьерасини шоу-бизнесда бошлаган биринчи хонимлар (фото)

Давлат бошқаруви билан шуғулланадиган раҳбарларнинг рафиқаси бўлгунига қадар мазкур биринчи хонимлар мода, медиа, мусиқа ва кино оламида етарлича машҳурликка эришиб бўлган.

Карла Бруни-Саркози

Николя Саркозининг учинчи рафиқаси модель бўлган. Унинг кийиниш услуби ва гардеробидаги либослар сиёсатга модани олиб келган деса ҳам хато бўлмайди. Кийиниши сабаб уни Жаклин Кеннедига қиёслашган. Мусиқачилар оиласида дунёга келган Бруни вояга етганида ижод йўлидан кетишга қарор қилган. Мактабни битирганидан кейин архитектор бўлишни режалаштирган. Аммо моделлик карьерасини бошлаб юборган, City Моdels билан шартнома имзолаганида эндигина 19 ёшга тўлган эди.

Муваффақиятли лойиҳа ва ҳамкорликлар унинг машҳур бўлишига сабаб бўлган.  Ҳали танилиб улгурмасидан мода оламининг титанлари ҳисобланган Dior, Givenchy, Chanel, Yves Saint-Laurent ва бошқа брендлар билан ҳамкорлик қилган. 90 йиллардаги машҳур моделлар ҳақида гап кетганида Карланинг исмини тилга олмасдан илож йўқ.

Аммо Карла фақатгина моделлик билан чекланмаган, у ижод қилиш, альбом ёзиш, қисқа қилиб айтганда, мусиқий карьерасини ҳам маромига етказган. Альбом тақдим қилган, мукофотларни қўлга киритган собиқ биринчи хоним айни вақтда ҳам мусиқа билан шуғулланиб туради. Қолаверса, у Елисей саройида яшаган вақтида ҳам ижодни ташлаб қўймаган. Турмуш ўртоғи президент бўлганининг биринчи йилидаёқ Comme si de rien n’était альбомини тақдим қилган. Альбом сотувидан тушган маблағ эса хайрия ишларига сарфланган. 2011 йилда эса у режиссёр Вуди Алленнинг фильмида суратга тушишга ҳам муваффақ бўлган. Гапнинг индаллосини айтганда, Карла турмуш ўртоғидан қолишмайдиган даражада машҳур. Айни вақтда ҳам мавқейини ушлаб туришга ҳаракат қилади ва мусиқий карьерасини давом эттириб келади.

Мелания Трамп

Дональд Трампнинг учинчи рафиқаси Мелания коммунистик мамлакатда дунёга келган ягона биринчи хоним саналади. У Люблянада дунёга келиб, модель сифатида карьера қилиш учун у ерни тарк этган. У болалигида Словениядаги болалар мода чиқишида иштирок этган, 16 ёшида эса илк марта профессионал фотосессияда ўзини синаб кўрган.

У Карла Бруни сингари машҳур бўлмаган бўлса ҳам мода оламида ўзига яраша ном қозонишга муваффақ бўлган: моделлик агентлари билан шартнома тузиб, мода чиқишлари, журнал муқоваси учун суратлар ҳатто гўзаллик танловида иштирок этган. Трампнинг дўсти Паоло Замполли уни пайқаб, Нью-Йоркда модель сифатида фаолият юритишни таклиф қилмаганида, АҚШга кўчиб бориш унинг хаёлининг кўчасига ҳам келмаган бўларди. Шу баҳона бўлиб Трамп ва Мелания танишиб қолади.

Шундоқ ҳам чиройли ва латофатли бўлган Меланиянинг ишлари Трамп билан танишувидан кейин янада юришиб кетади. Модель сифатида карьераси гуллаб-яшнайди, реклама агентларидан таклифлар келиб туша бошлайди. Кейинроқ Мелания косметик брендга, заргарлик буюмлари коллекциясига асос солади. Хуллас, Оқ уйнинг бекасига айлангунига қадар ҳам Мелания ўзига яраша машҳур бўлган.

Софи Грегуар-Трюдо

Замонамизнинг энг келишган ва машҳур сиёсатчиларидан бири бўлган, Канада бош вазири Жастин Трюдонинг рафиқаси Софи номини аввал бутун дунё аҳолиси бўлмаса ҳам Канаданинг Квебек провинциясидаги ҳар иккинчи одам билган.

Бунга унинг мунтазам равишда экранларда турли кўрсатув дастурларда чиқиши сабаб бўлган. Ёшлигида фотомодель, рекламачи бўлиб фаолият олиб борган Софи журналистика соҳасига жуда ҳам қизиққан. Маҳаллий радио-телевидение мактабини тамомлаганидан кейин LCN телеканалида ишлай бошлаган. Медиа саноатидаги фаолияти сабаб ҳам у турмуш ўртоғини учратган. Mercedes-Benz томонидан ташкил қилинган хайрия тадбирида бошловчиликка таклиф қилинади ва айнан шу тадбирда Жастин ҳам қатнашади.

Пэн Лиюань

Хитой раиси Си Цзиньпин машҳурликда рафиқаси Пэндан ортда деса ҳам хато бўлмайди. Улар ёшлигидаёқ бир-бирига кўнгил қўйиб учрашишни бошлаган, аммо бу вақтда Си эндигина сиёсатга қадам қўйган йигитча бўлса, Пэн Хитой эстрадасида ўз ўрнини топиб бўлган юлдуз эди. Пэн ижод муҳити ҳукм сурган оилада дунёга келган ва мусиқага қизиқа бошлаган.

Унинг онаси опера йўналишида ижод қилганига қарамай, Пэн ҳарбий қўшиқлар куйлашни афзал билган. Барча давлат тадбирлари усиз ўтмайдиган бўлиб қолган ва ватанпарварлик руҳидаги қўшиқлар билан мухлислар қалбидан жой олган. Биринчи хоним сифатида Пэн бугунги кунда чиқиш қилмай қўйган бўлса ҳам онда-сонда мухлислар кўзини қувнатиб туради.

Вероника Ларио

Сильвио Берлусконининг рафиқаси Вероника театр ва кино актрисаси бўлган, аммо юқоридаги хонимлар сингари машҳур бўлмаган. У актрисаликни 70 йиллар ўртасида театрдаги песа ва сериалларда кичик роллардан бошлаган ва бу вақтда Италияда машҳур бўлган режиссёр ва актёр Энрико Мария Салерна билан севишиб юрган.

Айнан Энрико актриса иштирокидаги песаларни саҳналаштирган. Ижро давомида Ларионинг латофати ва актрисалик маҳорати Берлусконининг ҳам эътиборини тортган. Вероника у билан расмий турмуш қургунига қадар ҳам 10 йил бирга яшаган ва айнан шу вақтда бир неча машҳур фильмларда суратга тушган. Аммо турмуш ўртоғининг хиёнатидан кейин ажрашган ва шундан кейин бошқа актрисалар Берлусконининг қалбини забт этган аёл ролини ижро қилишни орзу қила бошлаган.