Бу йил афсонавий “Тетрис” ўйини 40 йиллигини нишонламоқда. Бир зумда ҳитга айланган ўйиндан илҳомланган режиссёр Жон С. Бейрд 2020 йилда Тэрон Эжертон ва Никита Ефремов иштирок этган шу номдаги фильмни суратга олишни бошлади.
“Варкрафт”: миқёси ва мухлислар қўллаб-қувватлаши
World оf Warcraft фандоми бир неча авлодни ўз ичига олади. Барчаси 1994 йилда Warcraft: Оrcs & Humans ўйини чиқиши билан бошланган бўлиб, у Azeroth дунёсидаги орклар ва инсонлар ўртасидаги буюк фантастик қарама-қаршиликка асос солган.
Warcraft фильмини Дункан Жонсон суратга олди. Режиссёр асл манбага эҳтиёткорлик билан ёндашиб, биринчи ўйин воқеаларини қисман экранга кўчирди. Лотар ва Дуротан ўртасидаги зиддият, сеҳргарлик, таниқли визуал услуб — буларнинг барчаси шунчаки сақлаб қолинмаган, балки кинога моҳирона мослаштирилган.
“Соник кинода”: кўк типратикан кутилганидан ҳам аъло натижа кўрсатди
Кўк реактив типратикан ҳақидаги платформер ўйиннинг биринчи талқини муваффақиятсизликка учрагач ва мухлисларнинг кескин муносабатидан сўнг, студия бош қаҳрамон қиёфасини қайта кўриб чиқишга мажбур бўлди, бу бежиз эмас эди. “Соник кинода” жонли ва кулгили чиқди, асл нусханинг руҳини сақлаб қолди. Фильмнинг муваффақияти франшиза пайдо бўлишига сабаб бўлди: тўртинчи қисмнинг чиқиши 2027 йилга мўлжалланган.
Гран Турисмо: пойга симулятори муваффақият тарихига қандай айланди
PlayStation’даги энг зўр пойгалардан бирининг экранизациясига режиссёр Нил Бломкамп ғайриоддий ёндашиб, геймер Янн Марденборонинг ҳақиқий пойгачига айланиши ҳақидаги воқеани ҳикоя қилади.
Гран Турисмо машиналар ҳақидаги ажойиб фильмдан кутилган барча нарсани тақдим этади: адреналин ва шиддатли тезлик. Ким билсин, балки ижодий гуруҳ томошабинларга “Форсаж” франшизасига муносиб рақобатчи асарни яратгандир?
“Ака-ука Супер Мариолар”: янги форматда катта экранда болалик даври
Бруклинлик сантехниклар Марио ва Луижи малика Пични қутқариш учун йўлга чиқишади. Ушбу классикани экранга кўчириш учун биринчи уриниш қарийб ўн йилдан кейин амалга оширилди. Бироқ ҳатто бош ролни ажойиб тарзда ижро этган Боб Хоскинс ҳам лойиҳани муваффақиятсизликдан сақлаб қололмади.
2023 йилда чиққан “Ака-ука Супер Мариолар кинода” фильми анча муваффақиятли бўлиб, прокат даромади бир миллиард доллардан ошди.
Doom: мухлислар учун эҳтиром, баҳс-мунозаралар ва “Олтин малина”
2005 йилда Doom машҳур отишма ўйинининг экранлаштириши чиқиши билан ўйин ҳамжамияти ва кино танқидчилари ўртасида энг шов-шувли баҳс-мунозаралар авж олди. Машҳур шарҳловчи Рожер Эберт фильмни танқид қилиб, уни маъносиз, қонли отишма деб атади.
Бироқ Эберт битта тақриз билан чекланиб қолмади. У 2010 йилда видеоўйинлар санъат эмаслигини эълон қилди, бу эса дарҳол кучли норозилик ва қизғин мунозараларга сабаб бўлди. Санъат чегаралари ҳақида гап кетганда, кино танқидчисининг сўзлари ҳанузгача иқтибос қилинади. Аслида у ҳақ эди: Doom фильм сифатида муваффақиятсизликка учради ва Дуэйн Жонсонга энг ёмон эркак роли учун ўзининг биринчи (ва охирги) “Олтин малина” мукофотини келтирди.
“Ўлим жанги”: ҳанузгача этни жунжиктирадиган машҳур муштлашув
1992 йил геймерларга ҳақиқий совға бўлди — машҳур “Мортал Комбат” жанг ўйини чиқди. Уч йил ўтгач эса “Ўлим жанги” фильми премераси бўлиб ўтди. Режиссёр Пол У.С. Андерсон классик сюжетни асос қилиб олган: узоқ оролда ўтказиладиган мусобақада Лю Кан, Жонни Кейж ва Соня Блейд ёвуз кучларга қарши курашади. Бу фильм видеоўйиннинг биринчи муваффақиятли экранлаштириши бўлди.
Изоҳ (0)