Замонамизнинг энг машҳур хонандаларидан бири Тейлор Свифт АҚШнинг Миссури штати, Канзас Ситида жойлашган болалар ва ўсмирлар касалхонасидаги беморлар ҳолидан хабар олди ва уларга қимматбаҳо совғаларни улашди, деб ёзмоқда “Правила жизни”.
Янги йил арафасида хонанда ва унинг қаллиғи, Kanzas City Chiefs футболчиси Тревис Келси “Меҳр-шафқат” болалар касалхонасига ташриф буюрди. У ерда жуфтлик оғир касалликка чалинган Ная исмли бемор билан суҳбатлашди ва унга Тейлорнинг ўзи учрашув пайтида кийиб олган кўйлагини совға қилди. Италиянинг Мiu Мiu брендига тегишли либоснинг нархи беш минг долларни ташкил этади. Бундан ташқари, хонанда мухлисига қора жемфер ҳам ҳадя қилди.
Ная исмли қизалоқ совғаларни очаётган вақтини видеога олди ва TikTok тармоғига жойлаштирди. Видеода у “Мен ҳозир ўзимни Тейлор Свифт каби ҳис қиляпман!”, деди.
Свифт шифохонадаги бошқа беморга 600 долларлик Dyson Аirwrap соч фенини совға қилди.
Аввалроқ 2023 йилни ўзининг Eras номли дунё гастроллари билан ўтказган Тейлор Свифт илк бор Forbes’нинг миллиардер инсонлар рўйхатига киритилгани хабар берилган эди. У бу мақомга даъвогар Россия президенти Владимир Путин ва Хитой раҳбари Си Цзиньпинни ортда қолдирди. Бугунги кунда хонанда Американинг Billboard журналига кўра 21-асрнинг энг буюк поп юлдузлари рейтингида 2-ўринда турибди.
Bloomberg нашрига кўра, унинг мусиқий альбом, концертлар, гастрол ва турли рекламалар орқали орттирган бойлиги 1,1 млрд долларни ташкил қилади. Тейлор тарихда мусиқасидан миллиард доллардан кўпроқ даромад олган биринчи хонанда ҳисобланади.
Изоҳ (0)