Поп ва кантри усулидаги қўшиқлари билан танилган америкалик хонанда Тейлор Свифт нафақат ўз ватанида, балки бутун дунёда миллионлаб мухлисларга эга. Унинг концертлари ҳатто ривожланган мамлакатларда иқтисодий вазиятни ўзгартириб юборган.
Қўшиқчи Гиннес рекордлар китобига тарихдаги энг даромадли концерт гастроли ташкилотчиси сифатида ҳам кирган. 2023 йилда “Йил одами” унвонига сазовор бўлган хонанда санъат соҳасидаги янгиликлардан ташқари кўчмас мулкларга бўлган иштиёқи билан ҳам ажралиб туради. Яқинда у навбатдаги ҳашаматли уйни харид қилди.
Бинонинг ташқи кўриниши
Forbes нашрининг энг бадавлат миллиардерлари рейтингидан ўрин олган Тейлор Свифтнинг мазкур уйи Атлантика океани соҳилида, Род Айлендда жойлашган. Хонадон қирғоққа яқин ҳудудда қурилганлиги сабабли ўзининг шахсий пляжига ҳам эга.
Уйнинг ўзи уч қаватдан иборат бўлиб, денгиз сатҳидан анча баланд ҳудудда жойлашган. Қасрдек ҳашаматли хонадон юз йил аввал қурилган ва унга “Баланд соат” деб ном берилган. Бинонинг ташқи томони ёрқин безаклар ва мураккаб меъморий шакллардан ҳоли бўлиб, экстерьер сокин кулранг ва оқ рангларда тузилган.
Интерьер
Хонадонга кириб борсангиз, бинонинг ташқи томони уйнинг ички қисмидан тубдан фарқ қилишининг гувоҳи бўласиз. Уйнинг дизайнида кўтаринки кайфият бахш этадиган ёрқин ранглардан фойдаланилган. Тўқ пушти рангда ишланган меҳмонхона шинам камин, ёғочдан ясалган стол-стуллар ҳамда декоратив гуллардан иборат. Юмшоқ мебеллар ҳам девор рангларига монанд пушти рангда. Қўшни хонада овқатланиш ва дам олиш зонаси бўлиб, у ерда ҳам нафис ранглардан фойдаланилган, ошхонанинг деразалари эса соҳилга қараган.
Хонанда Тейлор Свифтнинг бошқа ҳудудларда ўнга яқин турли шаклдаги кўчмас мулклари мавжуд. Юлдузга тегишли хонадонлар рўйхатида Беверли Ҳиллсдаги коттеж ва квартира, Нью Йорк ва Нешвиллдаги апартаментлар, Теннесидаги катта ҳовли ҳам бор.
Изоҳ (0)