Россиянинг “Урса Майор” савдо кемаси Ўрта Ер денгизида Испания ва Жазоир ўртасидаги халқаро сувларда ҳалокатга учради. Бу ҳақда Ла Вердад ва Эл Эспаñол нашрлари хабар берди.
Маълум қилишича, 23 декабрь куни кундузи кема бортидаги машина бўлимида портлаш юз берган. Шундан сўнг кема фалокат ҳақида сигнал юборган. Қутқарув операциясига Россия ҳарбий кемаси раҳбарлик қилган. Экипажнинг икки аъзоси бедарак йўқолган, 14 нафар аъзоси эса қутқарилиб, Картахена портига олиб келинган.
“Урса Майор” капитани кемада ҳалокат пайтида бўш бўлган контейнерлар ташилганини маълум қилди. У 11 декабрь куни Санкт-Петербург портидан жўнаб, 22 январь куни етиб бориши режалаштирилган Владивостокка йўл олган. “Оборонлогистика” компанияси маълумотларига кўра, у ерга ҳар бири 380 тонна оғирликдаги порт кранларини етказиб бериши лозим эди.
“Медиазона” хабар беришича, ушбу юк ташувчи кема узоқ йиллар давомида Суриядаги Россия ҳарбий гуруҳини таъминлаш учун юклар ташиган. Мутахассислар фикрича, Ўрта ер денгизидаги бешта кеманинг барчаси Россиянинг Тартус ва Хмеймимдаги ҳарбий базаларини эвакуация қилиш учун мўлжалланган бўлиши эҳтимоли бор.
Изоҳ (0)