Россия Украинага қарши урушда иштирок этаётган Шимолий Корея ҳарбийларининг фронтдаги мавжудлигини яшириш учун уларга сохта гувоҳномалар бермоқда. Бу ҳақда Украина армиясининг Махсус операциялар кучлари хабар берди.
Маълумотни Курск вилоятидаги жангларда ҳалок бўлган КХДР аскарларига берилган ҳарбий гувоҳномалар тасдиқлайди. Ҳужжатларда уларнинг эгалари Тива Республикаси фуқаролари экани кўрсатилган. Бироқ шахсий имзолар корейс тилида қўйилган. Шу тариқа Шимолий Корея ҳарбийлари сохта шахсият остида жангларда қатнашган.
Ушбу ҳарбий гувоҳномаларда муҳрлар, фотосуратлар йўқ, отасининг исми рус услубида берилган, туғилган жойи эса Тива Республикаси деб кўрсатилган, дейилади хабарда.
Украина армияси россияликлар бундай чораларни “жанг майдонидаги йўқотишларини ва хорижий иштирокни яшириш учун” қўллаётганини таъкидламоқда.
Зеленский Россия армияси сафидаги шимолий кореяликлар ҳақида
19 декабрь куни Украина президенти Владимир Зеленский Брюсселда ўтказилган матбуот анжуманида журналистлар саволларига жавоб берар экан, “Россия Шимолий Корея ҳарбийларини ўз фуқаролари сифатида ниқоблайди, ҳалок бўлган аскарларнинг юзларини ёқиб юборади”, деганди. Зеленский ҳозирча жангларда 12 минг атрофида Шимолий Корея ҳарбийси қатнашаётганини айтганди.
Ҳозирча 12 мингдан ортиғини кўряпмиз. Улар ҳарбий хизматчиларимиз қайд этган миқдордан кўпроқ бўладими йўқми, билмайман, кўрамиз. Асирларга келсак, ҳозирча йўқ. Лекин бизда Шимолий Кореянинг ҳалок бўлган аскарлари тасвирланган видео ва фотосуратлар бор. Уларни деярли барчасини Россия паспортлари билан топишмоқда, деган эди Украина президенти.
Изоҳ (0)