Россия ташқи ишлар вазири ўринбосари Михаил Галузин Марказий Осиё билан 2023 йилда товар айирбошлаш ҳажми 44 миллиард доллардан ошганини айтди. Бу ҳақда “Коммерсант” хабар берди.
Галузиннинг таъкидлашича, Марказий Осиё ташқи савдосининг 33 фоизи Россияга тўғри келади, бу асосан миллий валюта тўловларига ўтиш ҳисобигадир.
Ҳозирда миллий валюталарда Қозоғистон, Қирғизистон ва Тожикистон билан ҳисоб-китоблар ҳажми 80 фоизга, Ўзбекистон билан 55 фоизга, Туркманистон билан 24 фоизга етди.
Россия минтақа учун ишончли ва асосий савдо-иқтисодий шерик бўлиб, бу товар айирбошлашнинг изчил ўсиши билан тасдиқланади, — деди вазир ўринбосари.
Россия бош вазири ўринбосари Александр Новакнинг таъкидлашича, Россия нефть ва газнинг 80 фоизини рубль ва юанда сотади. Унинг сўзларига кўра, доллардан воз кечиш бу глобал тенденция ва кўплаб давлатлар ўзаро миллий валюталарда тўловларга ўтмоқда.
2023 йил охирида Россия ва Хитой ўртасидаги товар айирбошлаш рекорд даражадаги 240,11 миллиард долларга етган.
Изоҳ (0)