Ижтимоий тармоқларда, жумладан, Telegram ва Instagram’да пиротехника воситаларини очиқдан-очиқ реклама қилиш ва сотиш хизматлари таклиф қилинмоқда. Мазкур турдаги маҳсулотлар савдоси билан шуғулланувчи онлайн дўконлар республиканинг исталган жойига етказиб бериш хизматларини ҳам тақдим этмоқда. Ҳаттоки сотувчиларнинг телефон рақамлари ҳам кўрсатиб ўтилган.
Пиротехника воситаларини Ўзбекистон ҳудудида эмин-эркин сотилаётгани бир савол бўлса, уларни мамлакат ҳудудига қандай кириб келгани ва кириб келаётгани мутасаддилардан масалага жиддий ёндашувни талаб қилади.
Мазкур саволлар юзасидан Давлат божхона қўмитаси ахборот хизмати раҳбари Ҳусан Тангриев “Дарё”га изоҳ берди.
Қонун бўйича бу нотўғри — маъмурий жавобгарликка тортилади. Агар кўлами жуда кўп миқдорда бўлса, жиноий жавобгарликка тортишга асос бўлади. Жорий йилдан мазкур турдаги жиноятлар учун жавобгарлик кучайтирилди.
Юқорида айтилган ҳолатлардан хабаримиз бор, тезкор ходимлар шуғулланяпти. Натижалари бўйича қўшимча маълумот берилади, деди Ҳусан Тангриев.
Амалдаги қонунчиликка кўра, пиротехника буюмларини қонунга хилоф равишда ишлаб чиқариш, тайёрлаш, сақлаш, ташиш, жўнатиш, улардан фойдаланиш, худди шунингдек уларни қонунга хилоф равишда Ўзбекистон Республикасига олиб кириш маъмурий ёки жиноий жавобгарликка сабаб бўлади.
Изоҳ (0)