24 июль куни Қирғизистон президенти Садир Жапаров прокурор ва терговчи ўз хизмат вазифаларини бажариш чоғида вафот этган тақдирда тўланадиган товон пули миқдорини камайтириш тўғрисидаги конституциявий қонунни имзолади. Бу ҳақда давлат раҳбари матбуот хизмати хабар берди.
Қонунга киритилган ўзгартиришларга мувофиқ, вафот этган прокурорнинг оиласига марҳумнинг охирги лавозими учун ўртача ойлик иш ҳақининг 20 баравари миқдорида бир марталик нафақа тўланади. Бунга қадар амалда бўлган “Қирғизистон Республикаси прокуратураси тўғрисида”ги қонун нормаси 20 йил, яъни 240 ой давомида ўртача иш ҳақи миқдорида нафақа тўлашни назарда тутар эди.
Киритилган ўзгартиришларга кўра, прокурор ва терговчи ўз хизмат вазифаларини бажариш чоғида жароҳатланган ёки меҳнатга лаёқатсиз бўлган тақдирда, уларга қуйидаги миқдорда бир марталик суғурта суммаси тўланади:
- I гуруҳ ногирони — охирги лавозими учун ўртача ойлик иш ҳақининг 10 баравари (ҳозир уларга 10 йил давомида иш ҳақи тўланади);
- II гуруҳ ногирони учун — ўртача ойлик иш ҳақининг саккиз баравари (ҳозир 8 йил);
- III гуруҳ ногирони учун — ўртача ойлик иш ҳақининг беш баравари (ҳозир 5 йил).
“Конституциявий қонун прокуратура ва бошқа ҳуқуқни муҳофаза қилувчи органлар ходимларининг хизмат вазифаларини бажариш чоғида вафот этган ёки ногирон бўлиб қолган тақдирда уларнинг оила аъзоларига кўрсатилган тўловларнинг мутаносиблигига эришишга қаратилган”, — дейилади Қирғизистон президенти матбуот хизмати хабарида.
“Прокуратура тўғрисида”ги қонунга ўзгартириш киритиш масаласи жорий йилнинг май ойида бахтсиз ҳодиса оқибатида ҳалок бўлган Жалолобод вилояти Чотқол тумани прокурори Бакирдин Жанузоқовнинг оиласига 21,7 миллион сом (250 минг долларга яқин) миқдорида нафақа тўлангани жамоатчилик эътирозига сабаб бўлганидан сўнг кўтарилди. Катта миқдорда товон пули нафақат ижтимоий тармоқлар фойдаланувчиларини, балки депутатларни ҳам ғазаблантирган.
Бош прокуратуранинг тушунтиришича, охирги лавозим учун 20 йиллик иш ҳақи миқдорида компенсация тўлаш қоидаси 1994 йилда қабул қилинган “Ички ишлар органлари тўғрисида”ги қонунда назарда тутилган. Ушбу қоида нафақат прокуратура органлари ходимларига, балки Миллий хавфсизлик давлат қўмитаси, Ички ишлар вазирлиги, Божхона ва солиқ хизматлари, Жазони ижро этиш хизмати вакилларига ҳам тегишли.
Май ойида Садир Жапаров ҳуқуқ-тартибот идоралари ходимларининг оилаларига товон пули тўлаш масаласини ўрганиш бўйича топшириқ берди. Молия вазирлиги уларнинг ҳажмини 12 бараварга қисқартиришни таклиф қилди. Жогорку Кенеш (Қирғизистон парламенти) 29 июнь куни бир марталик нафақа миқдорини қисқартириш бўйича тузатишларни қабул қилди.
Изоҳ (0)