Ijtimoiy tarmoqlarda, jumladan, Telegram va Instagram’da pirotexnika vositalarini ochiqdan-ochiq reklama qilish va sotish xizmatlari taklif qilinmoqda. Mazkur turdagi mahsulotlar savdosi bilan shug‘ullanuvchi onlayn do‘konlar respublikaning istalgan joyiga yetkazib berish xizmatlarini ham taqdim etmoqda. Hattoki sotuvchilarning telefon raqamlari ham ko‘rsatib o‘tilgan.
Pirotexnika vositalarini O‘zbekiston hududida emin-erkin sotilayotgani bir savol bo‘lsa, ularni mamlakat hududiga qanday kirib kelgani va kirib kelayotgani mutasaddilardan masalaga jiddiy yondashuvni talab qiladi.
Mazkur savollar yuzasidan Davlat bojxona qo‘mitasi axborot xizmati rahbari Husan Tangriyev “Daryo”ga izoh berdi.
Qonun bo‘yicha bu noto‘g‘ri — maʼmuriy javobgarlikka tortiladi. Agar ko‘lami juda ko‘p miqdorda bo‘lsa, jinoiy javobgarlikka tortishga asos bo‘ladi. Joriy yildan mazkur turdagi jinoyatlar uchun javobgarlik kuchaytirildi.
Yuqorida aytilgan holatlardan xabarimiz bor, tezkor xodimlar shug‘ullanyapti. Natijalari bo‘yicha qo‘shimcha maʼlumot beriladi, dedi Husan Tangriyev.
Amaldagi qonunchilikka ko‘ra, pirotexnika buyumlarini qonunga xilof ravishda ishlab chiqarish, tayyorlash, saqlash, tashish, jo‘natish, ulardan foydalanish, xuddi shuningdek ularni qonunga xilof ravishda O‘zbekiston Respublikasiga olib kirish maʼmuriy yoki jinoiy javobgarlikka sabab bo‘ladi.
Izoh (0)