Зулфира Нўмонова, «Дарё» ёш журналистлар мактаби тингловчиси
Жорий йилнинг 18 декабрь куни UzAuto Motors акциядорлик жамияти ва Монополияга қарши курашиш қўмитаси масаласи бўйича суд мажлиси бўлиб ўтди. Судда қўмитанинг шикояти қаноатлантирилмади.
UzAutoMotors ва қўмита ўртасидаги суд жараёнлари барчани бирдек қизиқтириб, доимий муҳокама марказида бўлиб келмоқда.
Жараён нимадан бошланган эди?
19 август қўмитанинг махсус комиссияси UzAuto Motors’да ўтказилган текширув натижасида компания машина нархини асоссиз оширган деб топганди. UzAuto Motors бу қарорга «Монополияга қарши курашиш қўмитаси томонидан иш бир тарафлама кўриб чиқилди, унинг якунида нотўлиқ маълумотларга асосланган қарор қабул қилинди», деб муносабат билдириб, қарор устидан судга шикоят қилди.Дастлабки суд
Тошкент шаҳар маъмурий судининг 30 октябрдаги ҳал қилувчи қарорига кўра, қўмита махсус комиссияси қарори ҳақиқий эмас деб топилди ва судда UzAuto Motors ютиб чиқди.Муаммога муносабат
Жараёнга блогерлар, депутатлар ва халқ ўз муносабатини билдирди. Жумладан, блогер Хушнудбек Худойбердиев суддан аввал суд жараёнларидан кўп нарса кутмаётганини ва бу иш бизни муаммолардан қутқармаслигини, бу касални тузатиш учун эмас, шунчаки вақтинча оғриқ қолдиришини айтди.Олий Мажлис Қонунчилик палатаси депутати Дониёр Ғаниев эса ўз Telegram-каналида «UzAuto Motors’га оид бугунги суд қарори мамлакатда монополияга қарши кураш, соғлом рақобат муҳитни яратиш борасида айтилаётган барча гаплар, кутилаётган ислоҳотлар илдизига болта урди», деб ёзиб қолдирди.
Ижтимоий тармоқлар фойдаланувчилари мавзуни кенг муҳокама қилди.
UzAuto Motors бўйича «махфий» маълумот
UzAuto Motors ва «Жиззах автомобиль заводи» МЧЖ импорт қилаётган автомобиллар учун импорт божи ва утилизация йиғими тўланиши бўйича Олий Мажлиснинг бир гуруҳ депутатлари Давлат божхона қўмитаси ва Молия вазирлигига 23 октябрь куни депутатлик сўрови киритди. Улар божхоначилардан тўловлар ҳақидаги маълумот «махфий» экани мазмунидаги жавобни 6 ноябрда қабул қилди.Навбатдаги суд. UzAuto Motors бу сафар ҳам ғолиб
18 декабрь куни Тошкент шаҳар маъмурий судида жавобгар келтирган аппеляция шикояти бўйича суд бўлиб ўтди. Суд қарорига асосан «биринчи инстанция судининг 30 октябрдаги ҳал қилув қарори ва хусусий ажрими ўзгаришсиз, келтирилган аппеляция шикояти қаноатлантирилмасдан қолдирилди », дея хабар берди Олий суди матбуот хизмати.Кейинги тафсилотлар
Суд натижасига жамоатчилик кескин муносабат билдирди. Олий Мажлис депутати Расул Кушербоев Facebook-саҳифасида «Антимонополия ва UzAuto Motors суди бугун тугади, менимча. Муаммо эса қолди. Бироқ бу муаммонинг тугашими, ё бошланиши, буни вақт кўрсатади», деб изоҳ қолдирди.«Миллий тикланиш» демократи партияси марказий кенгаши раиси Алишер Қодиров Telegram’даги шахсий каналида партия суд жараёни якунланиши билан Монополия қўмитаси Ўзбекистон иқтисодиёти ва UzAuto Motors компаниясининг халқаро репутациясига қанча зарар етказганини ҳисоблаш бўйича эшитув ташкил қилишини билдирди.
Ҳозирча иш шу нуқтага келиб қолди. Расул Кушербоевнинг жараён тугагани ҳақидаги хулосаси тўғрими ёки у ҳали давом этадими? Кузатишда давом этамиз.
Изоҳ (0)