Монополияга қарши қўмита бепул «стоянка» ўрнида қурилаётган Tashkent Central Park лойиҳасига имтиёз берилишини мақсадга мувофиқ эмас деб топди

Монополияга қарши курашиш қўмитаси Tashkent Central Park лойиҳасига имтиёз ва преференциялар берилишини мақсадга мувофиқ эмас деб топди. Бу ҳақда қўмита матбуот хизмати хабар берди.

Tashkent Central Park мажмуаси пойтахтнинг Шаҳрисабз ва Истиқлол кўчалари ва Амир Темур шоҳ кўчаси кесишмасида, собиқ йирик бепул автотураргоҳ ҳудудида қурилмоқда. Умумий майдони 2,5 гектар бўлган майдон учта 15 қаватли бино: меҳмонхона, икки қаватли ерости автотураргоҳга эга иккита бизнес марказ, шунингдек, яшил сайр майдонини ўз ичига олади.

Қиймати 400 миллион долларга баҳоланган лойиҳа Туркиянинг Taşkent Merkez Park Gayrimenkul Yatirim Anonim Şirketi ва Ўзбекистоннинг UzTur Investment and Development компанияси томонидан амалга оширилмоқда.

Норматив-хуқуқий ҳужжатлар лойиҳасини ишлаб чиқиш ва келишишнинг ягона электрон тизими (project.gov.uz) орқали Президентнинг «Tashkent Central Park кўп тармоқли мажмуаси қурилиши бўйича инвестиция лойиҳасини амалга оширишга доир қўшимча чора-тадбирлар тўғрисида»ги қарор лойиҳаси қўмитага тақдим этилган.

Қарор лойиҳаси билан Taşkent Merkez Park Gayrimenkul Yatirim Anonim Şirketi компанияси Туркия Республикаси ва UzTur Investment and Development МЧЖ ўртасида 27 май куни Tashkent Central Park лойиҳасини амалга ошириш бўйича инвестиция шартномаси имзоланганлиги кўрсатилган.

Унда 2024 йил 1 январгача инвесторлар, пудрат ва субпудрат ташкилотларини ягона ижтимоий тўловдан ташқари барча турдаги солиқлар ва йиғимлардан, хорижий мутахассисларининг иш ҳақи фонди бўйича ягона ижтимоий тўловдан, «вақтинча олиб кириш» божхона режимида олиб кириладиган ва расмийлаштириладиган қурилиш техникаси, машина ва механизмлар, асбоб-ускуналар, вақтинчалик бино ва иншоотлар, транспорт воситалари даврий божхона тўловларидан, қўшилган қиймат солиғидан – Ўзбекистон норезидентлари томонидан бажариладиган ишлар (кўрсатиладиган хизматлар) бўйича жисмоний шахслардан олинадиган фойда солиғидан озод этиш таклиф этилган.

Ҳужжатда, шунингдек, 2022 йил 1 январга қадар технологик ҳужжатлар, материаллар, хом ашё, ускуналар, эҳтиёт қисмлар, бутловчи буюмлар, шунингдек, металл прокатини олиб киришда божхона тўловларини тўлашдан (божхона расмийлаштируви учун йиғимлардан ташқари), 2022 йил 1 январдан 2024 йилга қадар эса ўрнатилган тартибда тасдиқланадиган рўйхатлар асосида юқорида қайд этилган товарлар олиб кирилганда божхона тўловларидан (божхона расмийлаштируви учун йиғимлар ва қўшилган қиймат солиғидан ташқари) озод қилиш кўзда тутилган.

Бундан ташқари, инвесторлар, пудратчилар ва субпудратчиларга инвестиция лойиҳасини амалга ошириш доирасида олиб кириладиган товарларни ўзининг сақлаш учун омборхоналарига жойлаштиришга рухсат бериш таклиф этилган.

Монополияга қарши курашиш қўмитасининг қайд этилишича, «Рақобат тўғрисида»ги қонунининг 12-моддасига мувофиқ давлат бошқаруви органлари ва маҳаллий давлат ҳокимияти органларининг айрим хўжалик юритувчи субъектларга уларни товар ёки молия бозорида фаолият кўрсатаётган бошқа хўжалик юритувчи субъектларга нисбатан афзал ҳолатга қўядиган имтиёзлар, преференциялар ва енгилликларни асоссиз равишда бериши та’қиқланиши кўрсатилган.

Бундан ташқари, Президентнинг 2017 йил 8 сентябрдаги фармонида хусусий сектор самарали фаолият кўрсатаётган соҳаларда давлат иштирокидаги тижорат ташкилотларини тузишга чеклов чораларини белгилаш ва амалдаги корхоналарни қайта ташкил этиш, шунингдек, соғлом рақобат муҳитининг ривожланишини чеклаётган алоҳида хўжалик юритувчи субъектларга эксклюзив ҳуқуқлар, индивидуал имтиёзлар ҳамда преференциялар бериш амалиётидан воз кечиш кўрсатилган.

Президентнинг 31 майдаги «Имтиёзлар ва преференциялар бериш тартибини тубдан такомиллаштириш чора-тадбирлари тўғрисида»ги қарорига асосан солиқ ва божхона имтиёзлари ҳамда преференциялар қонунлар ва Президент ҳужжатлари билан умуман тармоқлар, фаолият соҳалари, ҳудудлар учун берилиши, вақтинчалик имтиёзлар Президент ҳужжатлари билан 3 йилдан ортиқ бўлмаган муддатга берилиши, индивидуал имтиёзлар, алоҳида ҳолларда, хусусий сектор инвестиция киритишдан манфаатдор бўлмаган тармоқларда ижтимоий аҳамиятга эга лойиҳаларни амалга ошириш учун, аниқ ижтимоий ёки иқтисодий асослар мавжуд бўлганда ёхуд Ўзбекистоннинг халқаро шартномаларига мувофиқ, Президент ҳужжатлари билан берилиши кўрсатилган.

Лойиҳа юқоридаги қонунчилик ҳужжатларига зид эканлигини инобатга олиб Монополияга қарши курашиш қўмитаси, унинг қабул қилиниши мақсадга мувофиқ эмас деб ҳисобламоқда.

Tashkent Central Park қурилиши ҳақида 2018 йилнинг декабрь ойида маълум бўлганди. Вазирлар Маҳкамаси қарорига мувофиқ, 2019−2020 йилларга мўлжалланган лойиҳада беш юлдузли меҳмонхона, савдо-кўнгилочар марказ, тижорат банки учун маъмурий бинолар ва бошқа иншоотлар қуриш кўзда тутилган.

Инвесторлар ва пудрат ташкилотлари 2022 йил 1 январга қадар ягона ижтимоий тўловдан ташқари барча турдаги солиқлар ва давлат мақсадли жамғармаларига мажбурий тўловларни тўлашдан озод этиб бўлинган.