Тошкент шаҳрининг Чилонзор туманида 200 минг сўмлик қалбаки купюраларни тайёрлаган шахслар қўлга олинди. Бу ҳақда Бош прокуратура ҳузуридаги Иқтисодий жиноятларга қарши курашиш департаменти хабар берди.
Маълум қилинишича, фуқаро Э.А. фуқаро Ж.Х.га 200 минг сўмлик купюрадаги жами 300 дона 60 млн сўм қалбаки пулларни 20 млн сўмга сотган вақтида ушланган.
Унинг автомашинасидан 4 дона қалбаки купюра ҳамда 200 минг сўмлик миллий валюта сурати туширилган 89 дона А4 форматдаги қоғозлар, чизғич, қайчи ва канселярия пичоғи ҳамда фуқаролар Д.Т. ва Ж.З.дан компьютер ва рангли принтер ашёвий далил сифатида олинган.
Мазкур ҳолат юзасидан Жиноят кодексининг 176-моддаси (қалбаки пул, акциз маркаси ёки қимматли қоғозлар ясаш, уларни ўтказиш) билан жиноят иши қўзғатилиб, тергов ҳаракатлари ўтказилмоқда.
Қалбаки купюралар савдоси
Аввалроқ Тошкент вилоятида 10 минг долларни ноқонуний сотишга уринган шахслар ушлангани, Тошкент вилоятида қалбаки 100 минг сўмлик купюраларни тайёрлаш билан шуғулланган оила аниқлангани тўғрисида хабар берилганди.
Шунингдек, Тошкент вилоятида олган қарзи ўрнига қалбаки 3,2 минг доллар берган шахс ушланганди. Бундан ташқари, Андижон вилоятининг Асака туманида қалбаки 100 миллион сўм пулни 57 миллион сўмга сотишга уринган шахслар қўлга олинган.
Шу билан бирга, Фарғона вилоятининг Қўштепа туманида қалбаки 100 минг сўмлик купюра тайёрлаб, уни муомалага киритган аёл ушланганди.
Изоҳ (0)