Ўзбекистон Сенатининг янги биносига фотосаёҳат

Ўзбекистон Сенатининг эски биноси Мустақиллик майдонида жойлашган — бино ҳатто эски намунадаги 10 минг сўмлик купюрада ҳам Сенат сифатида акс эттирилган (янги купюра 2021 йил августидан муомалага киритилди). 2018 йил ёзида Ташқи ишлар вазирлиги Халқ банкининг эски (собиқ Тошкент ҳокимлиги) биносига кўчиб, ТИВ биносига эса Сенат кўчиб ўтиши маълум бўлганди.

Бироқ орадан кўп ўтмай Сенат аппарати ходимлари ва сенаторлар Мустақиллик майдонидаги ўз биносига қайтган. Бунга сабаб сифатида ТИВнинг собиқ биноси жиддий таъмирга муҳтожлиги, у ерда Сенатнинг «нормал ишлаши ва тадбирларни ўтказиши учун шароит йўқ»лиги кўрсатилган.

2021 йил бошида таъмирланаётган бинони президент Шавкат Мирзиёев кўздан кечирди. Ўшанда Олий Мажлис палаталарининг қўшма мажлисини ўтказиш учун 280 ўринли зал ташкил этилаётгани, у миллий нақшлар билан безатилиб, замонавий техникалар билан жиҳозланаётгани маълум қилинган эди. Лойиҳага кўра, 6 қаватли эски бино тубдан реконструкция қилиниб, қўшимча объектлар қурилиши режа қилиниб, ўша пайтда муҳандислик тармоқлари монтаж қилинаётган эди.

Ўша вақтдаёқ янги бинода делегациялар билан учрашувлар, матбуот анжуманлари, ОАВ вакиллари учун ҳам барча шароитлар яратилиши айтилган. Маълумот учун, Президент Шавкат Мирзиёевнинг инаугурация маросими ҳам 6 ноябрь куни айнан ушбу бинода бўлиб ўтган.

«Дарё» муштарийларига мамлакат юқори палатасининг янги биноси қандай кўринишга эга эканини биринчилардан бўлиб намойиш қилиш учун матбуот хизмати билан боғланиб, ундан фотогалерея тайёрлашга қарор қилдик. Сўровимизга қисқа муддатда ижобий жавоб олдик. 16 февраль куни кўзланган манзилга етиб келганимизда Сенат матбуот хизмати вакиллари бизни кутиб олишди ва галереяни бинонинг асосий кириш қисмидан бошладик.

Айни пайтда Сенатнинг ялпи мажлислари ва парламент қўшма мажлислари учун мўлжалланган асосий зал 450 кишига мўлжалланган. Улардан 350 ўрин сенатор ва депутатлар ҳамда ҳукумат аъзолари, қолган 100 ўрин оммавий ахборот воситалари ходимлари ҳамда меҳмонлар учун ташкил этилган. Парламент вакилларининг 250 иш столида овоз бериш пультлари мавжуд бўлса, қолган 100 та ўринда савол-жавоб жараёнлари учун иштирок пультлари бор. Залда тўғридан-тўғри кузатув учун жами 9 та камера ўрнатилган бўлиб, улар залда сўз олган шахсга автоматик тарзда йўналтирилади. Яъни сўз олганлар бунинг учун жавоб тугмасини босишлари кифоя.

Залда ОАВ вакиллари учун яратилган шароитга урғу берар эканмиз, ҳудуд етарлича катта эканлиги сабаб жонли эфирлар ёки ТВ вакилларининг стендаплари иштирокчиларга ортиқча ноқулайлик туғдирмаслигини кўришимиз мумкин. Яъни ҳудуд ҳаракатланиш учун қулай ва кенг, шунга мувофиқ, залнинг исталган нуқтасидаги шовқин иш жараёнига таъсир этмайди.

Залдаги 3 та экраннинг ҳар бирининг ўлчами 21 квадрат метр майдонга тенг. Тасвир сифати ўта юқори даражада тиниқ.

Залда 3 та телевизион камера мавжуд бўлиб, улар турли тадбирларни трансляция қилишда жуда қўл келади.

Залнинг деразаларига эътибор берилса, улардан қуёш нури бемалол тушиб туришини сезиш қийин эмас. Президент Шавкат Мирзиёевнинг қурилиш жараёни билан танишиш вақтидаги «Парламентимиз фаол ишлаяпти. Мажлислар пайтида битта қонун лойиҳаси соатлаб муҳокама қилинади. Шунинг учун иштирокчиларнинг ҳаракатланиши, саломатлиги, ёши билан боғлиқ ҳар бир жиҳатни эътиборга олиш, шунга яраша қулайлик яратиш зарур. Залга қуёш нури тушиб турса, кайфиятга, ишга яхши таъсир қилади», — деган тавсияси асосида шундай қулайликка қўл урилгани Сенат матбуот хизмати томонидан қайд этилди.