Давлат хавфсизлик хизматининг Тошкент вилояти бўйича бошқармаси ҳамда Бош прокуратура ҳузуридаги департаментнинг ҳудудий бошқармаси ходимлари томонидан Янгийўл шаҳрида ўтказилган тезкор тадбирда қалбаки пул тайёрлаш билан шуғулланувчи шахслар фаолиятига чек қўйилди, деб хабар беради ЎзА.
Маълум қилинишича, 1993 йил Қашқадарё вилоятида туғилган фуқаро Янгийўл шаҳридаги яшаш манзилида онаси ҳамда аёли билан биргаликда қалбаки миллий валюта тайёрлаш билан шуғулланган.
Ўтказилган тезкор тадбир давомида улардан 19,6 миллион сўм миқдоридаги 196 дона қалбаки 100 минг сўмлик купюра, 2 та компьютер, 2 та рангли принтер, қоғоз кесиш ускунаси ва бошқа ашёвий далиллар расмийлаштириб олинган.
Шунингдек, уларнинг яшаш хонадонида 1 дона пневматик тўппонча борлиги ҳам аниқланиб, тегишли тартибда олиб қўйилган.
Бундан ташқари, қалбаки валюта сотиб олиш учун келган Самарқанд вилоятининг Нуробод туманида яшовчи, 1971- ва 1984- йилларда туғилган, муқаддам судланган икки нафар шахс ҳам ҳибсга олинган.
Ҳозирда мазкур ҳолат юзасидан жиноят иши қўзғатилиб, тергов ҳаракатлари олиб борилмоқда.
Аввалроқ Тошкент вилоятида 10 минг долларни ноқонуний сотишга уринган шахслар ушлангани, Тошкент вилоятида 200 млн сўмдан ортиқ қалбаки пулларни муомалага чиқариб юборган шахслар ҳибсга олингани, Тошкентда 100 минг сўмлик купюраларни қалбакилаштирганлар қўлга олингани тўғрисида хабар берилганди.
Изоҳ (0)