Ўзбекистон Республикаси мустақилликка эришгач, 1991 йилда Конституцияга ўзгартиришлар киритилгач, Ўзбекистон ССР Давлат банки Ўзбекистон Давлат банки деб номланган ва бундан салкам бир йил ўтиб, 1992 йил 2 июлда эса Ўзбекистон Марказий банки ташкил этилган.
Унинг зиммасига мамлакат пул-кредит сиёсатини олиб бориш, тижорат банклари, тўлов ташкилотлари ҳамда бир неча нобанк кредит ташкилотлари фаолиятини лицензиялаш, нақд пул муомаласини ташкил этиш, валютани тартибга солиш, Ўзбекистон Республикасининг тўлов балансини, халқаро инвестициявий мавқеини, ташқи қарзини ва захира активларини ўз ичига олган банк, пул-кредит статистикасини, ташқи сектор статистикасини шакллантиришни ҳамда эълон қилишни амалга ошириш ва бошқа қатор вазифалар юклатилди.
Ҳозирги кунда Марказий банк тасарруфида 14 та ҳудудий бош бошқармалари ва 10 та ташкилотларида минглаб ходимлар фаолият олиб бормоқда.
Марказий банкнинг ташкил этилиши миллий иқтисодиётни босқичма-босқич юксалтириш, банк-молия тизимининг мустаҳкамланишида муҳим рол ўйнаб, Марказий банк мамлакатимизни ривожлантиришга қаратилган барча ислоҳотларнинг фаол иштирокчиси бўлиб келмоқда.
Марказий банкнинг 30 йил давомида сўм билан боғлиқ ислоҳотлари
Ўзбекистоннинг миллий валютаси – сўм 1994 йилнинг 1 июлида муомалага киритилган.
Сўм дастлаб 1, 3, 5, 10, 20, 50 тийинлик тангалар ҳамда 1, 3, 5, 10, 25, 50, 100 сўмлик қоғоз купюралар билан бир вақтнинг ўзида муомалага кирган. 1997–2001 йиллар оралиғида 200, 500, 1000 сўмлик купюралар чиқарилган.
2013 йилда Ўзбекистонда 5 минг ва 10 минг сўмлик пуллар муомалага чиқарилди. 2017 йилда ўзбекистонликларга бирданига иккита янги купюра – 50 ва 100 минг сўмлик пуллар таништирилди. Орадан икки йил ўтиб, 2019 йилда эса 100 минг сўмлик пуллар муомалага чиқарилди.
2021 йил давомида 2 ва 20 минг сўмлик янги номиналдаги пуллар чиқарилди, 5, 10, 50 ва 100 минг сўмлик купюраларнинг янги кўринишдагилари пайдо бўлди.
2022 йил июнь ойида Марказий банк сўминг рамзини эълон қилди. Бироқ сўм рамзи жамоатчилик томонидан норозиликларга учради.
Изоҳ (0)