Тошкент вилоятида 4,8 минг долларни ноқонуний сотишга уринган шахс ушланди

Тошкент вилоятида ноқонуний валюта савдоси билан шуғулланган шахс қўлга олинди, деб хабар беради Бош прокуратура ҳузуридаги департамент.

Маълум қилинишича, департаментнинг Қибрай туман бўлими томонидан валюта қимматликларининг ноқонуний муомалага киритилишининг олдини олиш юзасидан ДХХ ва вилоят ИИББ ходимлари билан ҳамкорликда тезкор тадбир ўтказилган.

Тадбир давомида Тошкент тумани ҳудудида жойлашган кийим-кечак савдо бозори ҳудудида ноқонуний валюта олди-сотдиси билан шуғулланиб келган фуқаро А.А. ўзининг яшаш уйида фуқаро С.га жами 4,8 минг долларни 51,8 миллион сўмга сотган вақтида ушланган. Шунингдек, тадбир давомида 15 383 доллар, 264 минг қозоқ тенгеси, 89 минг Россия рубли ва 414,3 миллион сўм ашёвий далил сифатида олинган.

Мазкур ҳолат юзасидан Жиноят кодексининг 177-моддаси (валюта қимматликларини қонунга хилоф равишда олиш ёки ўтказиш) билан жиноят иши қўзғатилиб, тергов ҳаракатлари ўтказилмоқда.

Аввалроқ Тошкент вилоятида 10 минг долларни ноқонуний сотишга уринган шахслар ушлангани, Бухорода 3 минг долларни ноқонуний сотган фуқароларга жиноят иши қўзғатилгани, Ўзбекистонда 1 миллион долларлик яхлит купюра сотаётган шахс ушлангани тўғрисида хабар берилганди.