Farg‘ona viloyatining Qo‘shtepa tumanida qalbaki 100 ming so‘mlik kupyura tayyorlab, uni muomalaga kiritgan ayol ushlandi. Bu haqda “Daryo”ga viloyat IIB axborot xizmati xabar berdi.
Ma’lum qilinishicha, noma’lum ayol Qo‘shtepa tumanidagi “Yangi do‘kon” mahalla fuqarolar yig‘ini hududida joylashgan dorixonaga borib, bir dona 100 ming so‘mlik pulga dori sotib olgan. Sotuvchi pulning qalbaki ekanini bilgach, ichki ishlar organiga murojaat qilgan.O‘tkazilgan sudga oid texnik-kriminalistik ekspertiza xulosasiga ko‘ra, 1 dona 100 ming so‘m qiymatidagi kupyura qalbaki usulda rangli printer yordamida tayyorlanganligi aniqlangan.
Mazkur holat yuzasidan Toshloq tumani IBB huzuridagi tergov bo‘linmasi tomonidan Jinoyat kodeksining 176-moddasi 1-qismi (qalbaki pul, aksiz markasi yoki qimmatli qog‘ozlar yasash, ularni o‘tkazish) bilan jinoyat ishi qo‘zg‘atilgan.
Qayd etilishicha, tergovga qadar tekshiruv davomida qalbaki kupyura M.A. ismli ayol tomonidan tayyorlanganligi aniqlanib, hozirda tergov harakatlari olib borilmoqda.
Izoh (0)