Ўзбекистонда янги кўринишдаги 50 минг ва 100 минг сўмлик банкноталар муомалага чиқарилди (фото)

Ўзбекистонда 27 декабрдан бошлаб янги 50 минг ва 100 минг сўмлик купюралар муомалага чиқарилди.

Декабрь бошида Ўзбекистонда янги кўринишдаги 50 минг ва 100 минг сўмлик банкноталар чиқарилиши тўғрисида хабар берилганди. 16 декабрь куни Марказий банк янги кўринишдаги номинал қиймати 50 минг сўм ва 100 минг сўм бўлган банкноталар дизайнини эълон қилди. Ўшанда янги банкнотлар 22 декабрдан муомалага чиқиши маълум қилинганди.

Бироқ 17 декабрь куни ижтимоий тармоқларда янги 50 минг сўмлик банкнота дизайнида хатоликка йўл қўйилгани тўғрисида хабарлар тарқалди ва Марказий банк хатоликка йўл қўйилганини тан олди. Яъни банкнот намунасининг олд томонида «Ал-Ҳаким ат-Термизий» мақбараси тасвири туширилган, аммо мақбара номи «Абу Исо ат-Термизий» деб ёзилган эди.

Маълумот учун, ҳозирги вақтда ўзбек сўмининг энг катта қийматли купюраси 100 000 сўм ҳисобланади. Мазкур купюра 2019 йил 25 февралдан муомалага чиқарилган.

Эслатиб ўтамиз, Ўзбекистонда 2021 йилнинг 14 июнидан бошлаб номинал қиймати 2 000 сўм ва 20 000 сўм бўлган банкнота кўринишидаги янги пул белгилари муомалага чиқарилганди. 2021 йилнинг 26 августидан бошлаб эса Ўзбекистонда 5 минг ва 10 минг сўмлик банкноталар янги кўринишда муомалага чиқарилишини бошлаган эди. Ўшанда Марказий банк вакили 5 минг ва 10 минг сўмлик банкноталар янги кўринишда чиқарилишига банкнотларни ягона тематикага бирлаштириш мақсади ҳам сабаб бўлганини айтиб ўтганди.