Тошкент шаҳри Чилонзор туманида имтиёзли шартлар асосида фуқароларга хонадон олиб беришни ваъда қилган МЧЖ раҳбари ва бошқалар аниқланди, дея хабар бермоқда Бош прокуратура ҳузуридаги департамент матбуот хизмати.
Маълум қилинишича, департаментнинг Чилонзор туман бўлими томонидан фуқароларнинг ҳуқуқ ва манфаатларини ҳимоя қилиш юзасидан ўтказилган терговга қадар текширувда «Б» МЧЖ раҳбари У.Г., ёрдамчиси Р.Д. ва бошқалар ноқонуний бойлик орттириш мақсадида турли хил тадбирлар ўтказиш йўли билан фуқароларнинг ишончини суиистеъмол қилган.
Улар гўёки ўзлари раҳбарлик қилаётган МЧЖ орқали кўп қаватли турар жой биносини қуришда улушли иштирок этиш тўғрисида юзаки «фиктив» шартномалар тузиб, хонадонларни имтиёзли шартлар асосида олиб беришни ваъда қилиб, 31 нафар фуқаронинг 25 000 АҚШ доллари ва 291 миллион сўмини фирибгарлик йўли билан қўлга киритгани аниқланган.
Мазкур ҳолат юзасидан Жиноят кодексининг 168-моддаси (фирибгарлик) билан жиноят иши қўзғатилиб, тергов ҳаракатлари ўтказилмоқда.
Бундан аввал Бухорода божхона инспектори хизмати эвазига 400 доллар олаётганида қўлга олингани, Ўзбекистонда 1 млн долларлик яхлит купюра сотаётган шахс ушлангани ҳамда Чирчиқда тадбиркорнинг 33 минг долларини қўлга киритиб, уни тотализаторда ютқазиб қўйган шахсга жиноий иш очилгани ҳақида хабар берилганди.
Изоҳ (0)