Исроил Эроннинг бешта ҳарбий объектга, жумладан, йирик авиабазага зарба бергани ҳақидаги маълумотларни ошкор қилмади. Бу ҳақда Британиянинг Telegraph газетаси Орегон штати университети ходимлари томонидан сунъий йўлдош маълумотлари таҳлилидан келиб чиқиб хабар берди.
“Ушбу маълумотларга кўра, Эроннинг олтита ракетаси Исроилнинг шимоли, жануби ва марказидаги илгари эълон қилинмаган бешта ҳарбий объектга, жумладан, йирик авиабаза, разведка маълумотларини йиғиш маркази ва логистика базасига тегган”, дея ёзади газета.
Нашрнинг қўшимча қилишича, яна 36 та ракета Исроил ҳаво мудофаа тизимини ёриб ўтишга муваффақ бўлган.
Исроил мудофаа армияси (САХАЛ) нашрга объектларга етказилган зарар ҳақидаги маълумотларни шарҳлашдан бош тортган.
“Фақат шуни айтишимиз мумкинки, барча тегишли бўлинмалар операция давомида ўз фаолиятини тўлиқ сақлаб қолди”, деди армия вакили.
Telegraph исроиллик журналистларнинг ҳарбий объектларга зарбалар ҳақидаги маълумотларини ҳам келтиради. Масалан, “13-канал”дан Равив Друкер “биз ҳали ҳам хабар қилмаган” “кўплаб” ракеталар тушгани ҳақида маълум қилган.
Эронлик манбанинг тушунтиришича, Исроил ҳаво ҳужумидан мудофаа тизимини ёриб ўтиш учун ракеталар ва дронларнинг комбинацияланган учирилиши қўлланган, бу эса ҳаво мудофаасини чалғитган.
“Исроил томонга камикадзе дронларни учиришдан асосий мақсад уларнинг тизимларини доимий равишда банд қилиб туришдир. Кўпчилиги ҳатто етиб бормайди — уларни йўлда ушлаб қолишади, лекин улар барибир чалкашлик келтириб чиқаради”, деди у.
Исроил ва Эрон ўртасидаги можаро 13 июндан 24 июнгача давом этди. У Исроил ҳарбий-ҳаво кучларининг ислом республикаси ҳудудига ҳаво ҳужумлари билан бошланди, бу эса Теҳроннинг жавоб ракета зарбаларига сабаб бўлди. Икки томондан ҳам ҳалок бўлганлар ва ярадорлар бор. 22 июнга ўтар кечаси Қўшма Штатлар жанговар ҳаракатларга қўшилди, шундан сўнг Эрон кучлари Қатардаги Америка ҳарбий базасига зарба берди.
Исроил раҳбарияти ҳарбий операциянинг бошланишини Эроннинг яқин келажакда ядро қуроли яратиш, шунингдек, ракеталар тўплаш таҳдиди билан изоҳлади. Теҳрон ядро қуролини ишлаб чиқишда айбловларни қатъиян рад этиб, тинч атом энергетикасини ривожлантириш ҳуқуқига эга эканлигини таъкидлади.
Изоҳ (0)