“Ливерпуль” — “Манчестер Сити” (2:0) учрашувида “Энфилд” стадионидаги мухлислар Хосеп Гвардиолага эрталаб уни истеъфога чиқаришларини айтиб бақиришганди. Ўша вақтнинг ўзида испаниялик мураббий мухлисларга қарата олтита бармоғини кўрсатиб, АПЛда неча марта чемпион бўлганига шаъма қилганди.
Ижтимоий тармоқларда эса кейинроқ Жозе Моуриньонинг шунга ўхшаш ҳолатда мухлисларга учта бармоғини кўрсатган сурати тарқалди.
Португалиялик мураббий “Манчестер Юнайтед”да ишлаган вақтда “Тоттенхем”га 0:3 ҳисобида енгилганидан сўнг мухлисларга шундай ҳаракат қилганди. Бу орқали у АПЛни уч марта ютганига ишора қилган.
Гвардиола ҳам шу ҳолатга ўз фикрини билдириб, Моуриньо АПЛ бош совринини 3 марта, ўзи эса 6 марта ютганини айтганди.
Жозе эса бу ҳақда қуйидагича гапирди:
“Гвардиола менинг манзилим сари АПЛ совринини олти марта ютганини, мен эса 3 марта ғолиб бўлганимни гапирибди. Лекин, мен уччала чемпионлигимни ҳам ҳалол ва тоза йўл билан қўлга киритганман.
Агар мен ютқазсам рақибни табриклайман, чунки у мендан яхшироқ бўлгани учун ютган. 150 та иш кўриб чиқилаётган паллада ғалаба қозонишни хоҳламайман. Мен ғалаба қозонишни хоҳлайман, лекин мен буни тоза ва ҳалол йўл билан қилишни хоҳлайман”.
Маълумот учун, Англия Премьер-лигаси “Манчестер Сити”ни 2009-2018 йиллар давомида молиявий қоидаларни 115 марта бузганликда айблаган эди. Мазкур иш юзасидан эшитувлар сентябрь ойида бошланган бўлиб, бу борадаги қарор 2025 йилнинг март ойида эълон қилиниши кутилмоқда.
Изоҳ (0)