Футбол бўйича Европа Чемпионлар Лигасининг чорак финал жавоб учрашувлари бўлиб ўтди. “Манчестер Сити” сафарда “Бавария” билан 1:1 ҳисобида, “Интер” эса ўз уйида “Бенфика” билан 3:3 ҳисобида дуранг ўйнади. Италия ва Англия клублари мусобақанинг ярим финал йўлланмасини қўлга киритди.
“Бавария” — “Манчестер Сити” учрашувига оид рақамлар
“Манчестер Сити” қаторасига уч мавсум Чемпионлар Лигаси ярим финалига чиққан АПЛнинг учинчи клуби бўлди. Бунгача “Манчестер Юнайтед” ва “Челси” бундай натижага эришганди.
Гвардиолада навбатдаги тарихий рекорд
Пеп Гвардиола шогирдлари 26 та гол билан Чемпионлар Лигасининг 2022/23 йилги мавсумида энг кўп гол киритган жамоа бўлиб турибди. Шунингдек, Манчестер клуби мусобақада энг кам гол ўтказган жамоа ҳисобланади — 4 та.
“Манчестер Сити” мураббийи Пеп Гвардиола 10 та мавсумда Европа Чемпионлар Лигаси ярим финалига чиққан биринчи мураббийга айланди. Испан мутахассиси бу борада Карло Анчелоттини (9) ортда қолдирди.
“Бавария” Томас Тухель қўл остида учта ўйиндан бери ғалаба қозона олмаяпти. Мюнхен клуби Чемпионлар Лигасида чорак финали дастлабки учрашувида “Манчестер Сити”га 0:3 ҳисобида мағлуб бўлди, Бундеслига доирасида “Ҳоффенҳайм” билан дуранг ўйнаган бўлса, “Манчестер Сити”га қарши жавоб учрашувида ҳам 1:1 ҳисоби қайд этилди.
Тўхташни билмаётган Ҳоланд
Чемпионлар Лигасининг бир мавсумида инглиз клуби сафида гол уриш бўйича “шаҳарликлар” ҳужумчиси Эрлинг Ҳоланд “Манчестер Юнайтед” сафида ўйнаган Руд ван Нистелройга етиб олди. Норвегиялик футболчининг голлари сони 12 тага етди ва бу мусобақа жорий мавсумидаги энг яхши кўрсаткич бўлиб турибди.
Ҳоланд “Манчестер Сити”даги фаолияти давомида илк бор пенальтини аниқ амалга ошира олмади. Норвегиялик футболчи бунгача 11 метрлик нуқтадан етти марта гол урганди.
Кевин де Бруйне голли узатмалар бериш бўйича “Манчестер Сити”даги шахсий рекордини янгилади. Бельгиялик футболчи “Бавария”га қарши ўйинда 2022/23 йилги мавсумдаги 23-голли узатмасини амалга оширди.
“Интер” — “Бенфика” учрашувига оид рақамлар
“Интер” 13 йил деганда илк бор Европа Чемпионлар Лигаси ярим финалига чиқди. Миланликлар охирги марта 2009/10 йилги мавсумда бу босқичга етиб келган ва мусобақа чемпионлигини қўлга киритганди.
“Интер” Чемпионлар Лигаси ярим финалида ҳамшаҳари “Милан”га қарши майдонга тушади. Бу жамоаларнинг ЕЧЛ плей-офф босқичидаги учинчи тўқнашуви бўлади. Бунгача жамоалар 2002/03 йилги мавсумда ва 2004/05 йилги мавсумда ўзаро ўйин ўтказган. “Нерадзурри” уларнинг ҳеч қайсисида ғалаба қозона олмаган.
Италия клуби футболчиси Никола Барелла плей-офф баҳсининг иккала ўйинида ҳам гол урган “Интер” тарихидаги учинчи ўйинчи бўлди. Бунгача 2002/03 йилги мавсумда Кристиан Виери, 2005/06 йилги мавсумда Деян Станкович бундай натижа қайд этган.
Изоҳ (0)