“Барселона” кетма-кет учинчи бор “Реал”ни мағлуб этди, Хави Анчелоттига қарши ўйинларда устунликни мустаҳкамлади. “Камп Ноу”да ўтган “Эл-класико”дан рақамлар ва фактлар

Футбол бўйича Испания Ла Лигасининг 26-турида “Барселона” ва “Реал” жамоалари ўзаро тўқнаш келди ва унда каталонияликлар 2:1 ҳисобида ғалаба қозонди.

“Барселона” кетма-кет учинчи марта “Реал” устидан зафар қучди. Бунга қадар Хави шогирдлари Испания Кубогида (1:0) ва Испания Суперкубогида (3:1) мадридликларни мағлуб этганди. “Кўк-анорранглилар” сўнгги бор 2011 йилда худди шундай натижа қайд этганди. У вақтда “Барселона” бош мураббийи Гвардиола, “Реал” бош мураббийи эса Жозе Моуриньо эди. 

Хави жамоаси рақиб дарвозаси томони 17 та зарба берди, улардан 7 таси аниқ. Мадридликлар эса 11 та зарба йўллади ва улардан 3 таси дарвозага аниқ борди. Тўпга эгалик қилиш бўйича устунлик “Барселона” томонда — 54%-46%.

Хави Карло Анчелотти билан олтинчи марта тўқнаш келмоқда ва уларнинг 4 тасида испаниялик мутахассис ғалаба қозонди. Италиялик мураббийда эса иккита ғалаба мавжуд. 

“Барселона” “Эл-класико”лар тарихидаги 100-ғалабасини қўлга киритди. Жамоалар ўзаро 253 марта тўқнаш келди. Улардан 101 тасида “Реал”нинг қўли баланд келган. Қолган 52 та учрашувда дуранг натижа қайд этилган.