«Манчестер Сити» сўнгги турда «Астон Вилла» устидан ғалаба қозониб, 2021/22 йилги мавсум Англия чемпионлигини қўлга киритди.
«Шаҳарликлар» бош мураббийи Пеп Гвардиола 4 марта АПЛда (1992 йилда ташкил этилган) чемпионга айланди. Бу борада испаниялик мутахассис Жозе Моуриньо ва Арсен Венгерни ортда қолдирди. Ҳар иккала мураббий ушбу мусобақада 3 мартадан ғолиб бўлган эди.
Англия чемпионлигини қўлга киритиш бўйича Алекс Фергюсон етакчи ҳисобланади. Шотландиялик собиқ мураббий «Манчестер Юнайтед» билан бирга 13 марта АПЛда чемпионга айланган.
Гвардиола ўз фаолияти давомида 10 марта чемпионат ғолиблигини қўлга киритмоқда. «Манчестер Сити» билан 4 марта Англияда биринчи ўринни эгаллаган бўлса, Германия чемпионатида «Бавария» билан, Испанияда «Барселона» билан 3 мартадан бу натижага эришган.
Пеп 2008/09 йилги мавсум «Барселона»даги дебют мавсумидан буён мамлакат чемпионлигини қўлга киритиш бўйича топ-5 лигаларда етакчи ҳисобланади. 13 йилдан буён ҳеч бир мураббий 10 марта чемпион бўлмади.
Изоҳ (0)