Хосеп Гвардиола АПЛда Юрген Клоппнинг рекордини янгилади

“Манчестер Сити” Англия Премьер Лигасининг 23-турида “Астон Вилла”ни мағлубиятга учратди (3:1).

Бу “шаҳарликлар” устози Хосеп Гвардиола учун лига доирасидаги 250-ўйин бўлди. 52 ёшли мутахассис қўл остидаги жамоа АПЛ доирасидаги дастлабки 250 та ўйинда 184 та ғалаба қайд этди (32 дуранг, 34 мағлубият). Бу мусобақа тарихидаги энг яхши натижа.

Бу борада Пеп “Ливерпуль” устози Юрген Клоппнинг рекордини янгилади. Немис мураббийи бошқаруви остидаги “қизиллар” АПЛдаги 250 ўйинда 160 та ғалаба қайд этган.

“Челси”, “Манчестер Юнайтед” ва “Тоттенҳэм” жамоалари собиқ устози Жозе Моуриньо ҳисобида 158 та ғалаба бор. “Арсенал” собиқ мураббийи Арсен Венгерда бу кўрсаткич 146 га тенг. Рафаэл Бенитес (“Ливерпуль”, “Челси”, “Ньюкасл”, “Эвертон”) эса 138 та ғалабага эришган.

Гвардиола ғалабалар фоиз кўрсаткичи бўйича (73,6%) АПЛнинг айни вақтдаги мураббийлари орасида энг яхши натижа қайд этяпти.

Гвардиола ҳозирда “Астон Вилла”ни бошқараётган Унаи Эмери билан 14 марта тўқнаш келди. Илк бор улар 2008 йилда ўзаро рўбаро келганди (“Барселона” ва “Валенсия” бошқаруви остида). Бу ўйинларнинг ҳеч бирида Гвардиола ватандошига ютқазмаган.

“Манчестер Сити” ўз майдонида кетма-кет бешта ўйиндан бери ғалабали серия қайд этмоқда. Бундан аввал жамоа “Etihad”да “Арсенал” (1:0), “Вулверҳэмптон” (3:0), “Тоттенҳэм” (4:2) ва “Челси”дан (4:0) устун келганди.

Ўз уйидаги сўнгги 8 ўйинда “Манчестер Сити” 7 та ғалаба ва битта дуранг қайд этди. Манчестер жамоаси кейинги тўртта ўйинини сафарда ўтказади. 4 март куни эса ўзида “Ньюкасл”ни қабул қилади.