Нидерландиялик сиёсатчи Марк Рютте НАТОнинг янги бош котиби бўлади ва бу лавозимда норвегиялик Йенс Столтенберг ўрнини эгаллайди, дея Deutsche Welle хабар берди.
26 июнь куни Шимолий Атлантика альянси барча аъзо давлатларнинг розилиги олинганидан сўнг, Рюттени ўзининг янги раҳбари сифатида расман тасдиқлади, — дейилади хабарда.
10 йиллик бошқарувдан кейин ташкилотни тарк этаётган Столтенберг иттифоқчиларнинг қарорини олқишлаб, НАТОни “ишончли қўлларга қолдиришини” айтган. Столтенберг 57 ёшли “ворис”ни кучли етакчи ва консенсус воситачиси деб атаган.
Еврокомиссия раҳбари Урсула фон дер Ляен ЕИ ва НАТО ҳамкорлигини янада мустаҳкамлаш учун Марк Рютте билан яқиндан ҳамкорлик қилишини маълум қилган.
Германия, АҚШ, Буюк Британия ва Франция февраль ойида Рютте номзодини қўллаб-қувватлаган эди. Германия канцлери Олаф Шольц уни катта тажриба, хавфсизлик сиёсати тажрибаси ва кучли дипломатик маҳоратга эга “ажойиб номзод” деб атаган.
Марк Рютте Шимолий Атлантика альянсини 75 йиллик тарихида бошқарган тўртинчи нидерландиялик бўлади.
- Йенс Столтенберг 2014 йилдан бери НАТО бош котиби лавозимида ишлаб келаётганди. 2023 йил февраль ойида у мандатни яна узайтиришга интилмаслигини эълон қилган. Россия-Украина уруши бошланганидан кейин ўз лавозимини тарк этишнинг иложи йўқлиги сабабли Столтенберг ҳатто Норвегия банки раҳбари этиб тайинланишини рад этишга мажбур бўлган. Унинг НАТО раҳбари сифатидаги мандати 2024 йил 1 октябргача узайтирилган эди.
Изоҳ (0)