Ҳафиза Ортиқова Бухоро вилояти ҳокимининг ўринбосари — оила ва хотин-қизлар бошқармаси бошлиғи лавозимига тайинланди.
Вилоят ҳокимлиги матбуот хизматининг маълум қилишича, ушбу лавозимда 2021 йилдан буён ишлаб келган Феруза Ибрагимова бошқа ишга ўтаётгани муносабати билан лавозимидан озод қилинди.
Ҳафиза Ортиқова 1976 йил 24 декабрда Бухоро туманида туғилган. 1997 йилда Бухоро давлат университетини битирган. Биология фанлари доктори, профессор. Тайинловга қадар у 2024 йил февралидан буён Бухоро давлат педагогика институтининг Ёшлар масалалари ва маънавий-маърифий ишлар бўйича биринчи проректори вазифасида ишлаб келган. Ундан аввал Бухоро давлат университети Агрономия ва биотехнология факультети декани бўлган. “Шуҳрат” медали соҳиби.
Бундан аввал Бахтиёр Адилов Бухоро вилояти ҳокимининг ёшлар сиёсати, ижтимоий ривожлантириш ва маънавий-маърифий ишлар бўйича ўринбосари этиб тайинланганди. Бухоро вилоятининг Пешку, Вобкент, Қоровулбозор туманлари ҳамда Когон шаҳрида ҳокимлар ўзгарди.
29 ноябрь куни президент Шавкат Мирзиёев Бухоро вилоятида қўшимча имкониятларни юзага чиқариш, инвестиция ва иш ўринларини кўпайтириш чора-тадбирлари бўйича йиғилиш ўтказган эди. Унда Бухорода ҳокимлар, уларнинг ўринбосарлари ва сектор раҳбарлари 6 ой фавқулодда иш тартибига ўтиши белгиланганди.
Изоҳ (0)