Самарқанд шаҳрида тадбиркорнинг 6,4 млрд сўм маблағини қимор ўйинларига ютқазган ҳисобчи аниқланди. Бу ҳақда Бош прокуратура ҳузуридаги Иқтисодий жиноятларга қарши курашиш департаменти хабар берди.
Маълум қилинишича, “Пҳ.л.” МЧЖда ҳисобчи лавозимида ишлаган Б.М. банк электрон калитларидан фойдаланиб, МЧЖнинг 6,4 млрд сўм маблағини сохта маълумотларни расмийлаштириш орқали ўзининг номига очилган пластик карталарга ўтказиб олган.
Сўнг ушбу маблағларни интернетдаги қимор ўйинларида ютқазиб қўйган.
Мазкур ҳолат юзасидан Жиноят кодексининг 167-моддаси (ўзлаштириш ёки растрата йўли билан талон-торож қилиш) ва 228-моддаси (ҳужжатлар, штамплар, муҳрлар, бланкалар тайёрлаш, уларни қалбакилаштириш, сотиш ёки улардан фойдаланиш) билан жиноят иши қўзғатилиб, тергов ҳаракатлари ўтказилмоқда.
Тотализатор ўйнаб, ютқазилган миллионлар
Аввалроқ Сирдарёда 14 ёшли бола отасининг салкам 4 млн сўмини ўғирлаб, онлайн ўйинга сарфлагани маълум бўлганди. Шунингдек, Нукусда 9,2 млрд сўм пулни қиморда ютқазган банк ходими 8 йилга қамалгани, Фарғонада букмекерлик билан шуғулланган шахсга жиноят иши қўзғатилгани тўғрисида хабар берилганди.
Бухорода тотализаторда салкам 100 миллион сўм миқдорда пул ютқазган шахс ўз яшаш хонадонидаги сейфдан пулларни ўғирлаб, жинояти изини яшириш мақсадида сейфни ёқиб юборганди. Самарқандда 631 миллион сўмни ўзлаштириб, қиморда ютқазиб қўйган “Халқ банки” филиали ходими жазоланганди.
Бундан ташқари, Бухоро вилоятининг Шофиркон туманида ўзгалар номига кредит олиб, онлайн қиморга сарфлаб юборган 16 ёшли болага нисбатан жиноят иши қўзғатилганди.
Изоҳ (0)