“Дарё” Яшнобод тумани бўйлаб материаллар туркумини давом эттиради. Бугунги қаҳрамонимиз “Авиасозлар” бозорида салкам 30 йилдан ортиқ вақт мобайнида савдогарлик қилаётган Наргиза Қамбарова.
Мен Қамбарова Наргиза Ҳамидовна, 1985 йилда туғилганман. Яшнобод туманидаги 226-мактабни битирганман. Ота-онамнинг имконияти чегараланганлиги сабабли мактаб таълимидан кейинги босқичларни давом эттира олмадим. Бош фарзанд бўлганим учун уларнинг ҳунарини тутиб, савдо-сотиқ билан шуғулланишга қарор қилганман.
Ҳозирда “Авиасозлар” бозорида ҳўл мевалар савдоси билан шуғулланаман. Бу ерда меҳнат қилаётганимга мана салкам 30-35 йил бўлди. Турмуш ўртоғим ва тўрт нафар фарзандим бор. Фарзандларим 15, 9, 3, ва 1,5 ёшда. Фақат меҳнат ва иш орқали оиламизни боқамиз. Баъзан фарзандларим “Ойи, ишга чиқмасангиз-чи”, дейишади. Лекин ишламасам, рўзғорни тебратиб бўлармиди.
Бир кунлик фойда миқдорини аниқ айта олмайман. Сабаби бозорда ҳар куни барқарор фойда топиш жуда мушкул. Баъзан савдо бор, бошқа сафар йўқ. Масалан, 20-30 миллион сўмлик маҳсулот олиб келсангиз, ундан 1,5-2 миллион фойда қолади. Кеча, масалан, 1,5 миллион сўм фойда қилдим. Лекин бу эртага ҳам худди шунча даромад топаман, дегани эмас.
Савдонинг энг қизиқ томони — харидор келганида. Агар харидор бўлмаса ва меҳнат натижасиз қолса, ишнинг завқи йўқолади. Савдо йўқ бўлганда телефон билан овуниб, кечга томон уйга кетамиз. Харидорларни эса фақат ширин сўз билан жалб қилиш мумкин. Хушмуомала бўлмасангиз, улар бошқа келмайди. Биз ҳатто сайёҳлар билан ҳам ишлаймиз, шунинг учун тарбия ва ҳалоллик жуда муҳим. Фаолиятини эди бошлаётган савдогарларга доим муомала, тарбия, ва маданият муҳим эканлигини уқтираман. Ҳаёт ва бозор мени шулар орқали тарбиялади.
Мавсумий маҳсулотлар жуда яхши сотилади. Мен савдо учун энг зўр, деб билган баҳорда ўрик ва ровоч харидоргир, масалан. Олма ва нок эса тез бузилмаслиги билан фойдали. Фақат қишда совуқ туфайли қийналамиз. Меваларимиз музлаб қолмаслиги учун уларни яхшилаб ўраймиз ёки камерага олиб кирамиз.
Бўш вақтимнинг катта қисмини болаларимга бағишлайман. Улар билан дарс қиламиз, суҳбатлашамиз ва бирга овқат пиширамиз. Келажакда фарзандларим шифокор, адвокат каби катта-катта касбларни эгаллашини хоҳлайман. Ўзим етмаган орзуларим рўёбини уларда кўрмоқчиман.
Агар саёҳат қилиш имконияти бўлса, аввало, Самарқанд, Бухоро, Хоразм каби тарихий шаҳарларимизни айланиб чиқмоқчиман. Ана ундан кейин хорижий саёҳатларни ўйлаш мумкин.
Изоҳ (0)