«Дарё» сайтида ҳафтанинг энг муҳим ва муҳокамали хабарлар шарҳини бошлаймиз.
Афғонистонда тинчлик ўрнатиладими?
Гарчи дайжестимиз маҳаллий хабарларни шарҳласа-да, АҚШ ва «Толибон» келишувга эришганини эслашимиз жоиздир, чунки тинчлик келишувида, биринчидан, Ўзбекистоннинг каттагина ҳиссаси бўлса, иккинчидан афғон диёрида тинчлик ўрнатилиши Ўзбекистон учун ҳар тарафлама манфаатлидир.
Шу ҳафта ташқи ишлар вазири Абдулазиз Комилов Қатар пойтахтидаги Афғонистон тинчлик музокарасида қатнашди. Доҳадаги учрашувда АҚШ ва «Толибон» ҳаракати тинчлик келишувини имзолади. Маълумки, «Толибон» Афғонистонда битта ҳам америкалик аскар қолмагунча курашишини қайта-қайта такрорлайди. АҚШ президенти, ўз навбатида, афғон диёридан қўшинларини олиб чиқиш ниятини яна айтди. Бу умидбахш хабардир.
«Толибон» ҳаракатининг Қатардаги сиёсий ваколатхонаси раҳбари мулла Бародар Охунд Президент Шавкат Мирзиёевга Афғонистон муаммоларига доимий эътибор қаратгани учун миннатдорлик билдирди. У Ўзбекистоннинг саъй-ҳаракатлари туфайли афғон можароси яна халқаро ҳамжамиятнинг диққат марказида эканлигини эътироф этди.
Аввалроқ Сенат раисининг биринчи ўринбосари Содиқ Сафоев «Афғонистонда тинчлик ўрнатилиши Ўзбекистоннинг геосиёсий жиҳатдан янги босқичга чиқишига сабаб бўлиши мумкин», деб айтганди.
Тиббиёт муассасаларида ўзгариш
Тиббиёт коллежлари, халқ тилида айтганда «медучилишче»лар ўрнига Ибн Сино мактаблари ташкил этилиши самара берадими ёки анъанавий ном алмаштириш кампаниясига гувоҳ бўламизми? Бу ҳозирча ноаниқ. Аммо ўтган ҳафтада Президент иштирокида ўтказилган йиғилишда ушбу таклиф берилди ва тиббиётнинг ночор аҳволи ҳақида кўп гаплар бўлди.
Ҳар ўн минг аҳолига 23 нафар шифокор тўғри келадиган Ўзбекистонда маҳаллий тиббиёт ходимларининг кўникмасини оширишга эътибор қаратилмаяпти, ихтисослашган марказ ва ҳудудий муассаса ўртасида вертикал тизим шаклланмаган. 20-30 фоиз маблағ самарасиз сарфланяпти.
Йиғилишда буларнинг барчаси танқидий таҳлил этилди ҳамда соғлиқни сақлаш тизимини қайта кўриб чиқиб, бу борадаги қамровни кенгайтириш, малака ошириш курсларини Қорақалпоғистон ва вилоятлар марказларида ташкил этиб, мутахассисларга қулайлик яратиш бўйича топшириқлар берилди.
Янги тайинлов
2016 йилдан бери Бухоро вилоятига ҳокимлик қилиб келаётган Ўктам Барноев Ўзбекистон бош вазирнинг аграр ва озиқ-овқат соҳаларини ривожлантириш масалалари бўйича ўринбосари лавозимига тайинланди. Президент Шавкат Мирзиёев 28 февраль, жума куни, шу ҳақдаги фармонни имзолади.
Ҳозирга қадар Бухоро шаҳрига ҳокимлик қилиб келган Карим Камолов Бухоро вилояти ҳокими вазифасини бажарувчи этиб тайинланди. Эски ҳоким Ўктам Барноев лавозимидан ҳурмат билан кузатилгани айтилди.
Умра зиёрати вақтинчалик тўхтатилди
Хитой коронавируси зиёратчиларнинг ҳам йўлини тўсди. Ўзбекистон Вазирлар Маҳкамаси ҳузуридаги Дин ишлари бўйича қўмита Саудия Арабистони подшоҳлиги Ҳаж ва Умра вазирлиги 2020 йил 27 февраль кунидан дунёнинг барча мамлакатлари учун Умра визаси тақдим этишни вақтинча тўхтатганлигини хабар қилди.
Саудия Арабистони коронавирус тарқалишининг олдини олишда биргина бу чора билан чекланмасдан, Хитой, Япония, Сингапур, Жанубий Корея, Малайзия, Италия ва Қозоғистон фуқаролари учун электрон сайёҳлик визалар берилишини тўхтатиб қўйди.
Камбағаллик муаммоси очиқ тан олинди
Бу ҳафта «камбағалликни камайтириш» ибораси трендга чиқди. Ўзбекистон Президенти Шавкат Мирзиёев раислигида 27 февраль куни бўлиб ўтган видеоселектор йиғилишида Президент: «Дастлабки ҳисоб-китобларга кўра, 12-15 фоиз ёки 4-5 миллион аҳолимиз камбағал. Бу уларнинг бир кунлик даромади 10—13 минг сўмдан ошмаяпти, дегани. Ёки бир оилада машина ҳам, чорва ҳам бўлиши мумкин, лекин бир киши оғир касал бўлса, оила даромадининг камида 70 фоизи уни даволатишга кетади. Хўш бундай оилани ўзига тўқ дейиш мумкинми?», дея савол қўйди.
Сенат раиси Танзила Норбоева мавзу юзасидан «Ўзбекистон тарихида илк бор мамлакатдаги камбағаллик муаммоси очиқ тан олинди. Ҳозирда 4-5 миллион аҳоли камбағалликда яшамоқда», — деб фикр билдирди.
Хўш, камбағаллик нима? Бирлашган Миллатлар Ташкилотининг таърифича, кунига 1,90 АҚШ долларидан кам даромадга эга инсон камбағал ҳисобланади. Бу бир ойда 550 минг сўмга яқин пул ишловчилар камбағаллар тоифасига мансуб деганидир. Иқтисодчи Беҳзод Ҳошимовнинг ёзишича, Ўзбекистон дунёнинг энг камбағал 30-40 мамлакатидан биридир.
Ўзбекистон камбағалликни камайтириш учун қандай чоралар кўради? Бунинг учун узоқ муддатли стратегия ишлаб чиқилмоқда. Президент таъбири билан айтганда «аҳолини касбга ўқитиш, молиявий саводхонлигини ошириш, одамларда тадбиркорлик ҳиссини уйғотиш, инфратузилмани яхшилаш, фарзандларини ўқитиш, сифатли даволаниш, манзилли нафақа тўлаш тизимини жорий қилиш» каби ўзгаришлар ясалади. Ўзбекистонда Жаҳон банки, БМТнинг Ривожланиш дастури ва бошқа халқаро ташкилотлар билан бирга Камбағалликни камайтириш дастурининг ишлаб чиқилиши айтилди.
Бемаъни ташаббус
Анчадан бери дайжестимизда қовун туширган мансабдорлар ва беъмани ташаббуслар ҳақида ёзмагандик. Жиззахлик педагоглар бизга яна илҳом бағишлади.
Ижтимоий тармоқларда мактабда ўқувчилар доскага бир қатор қилиб чиқарилиб, уларнинг сочи чизғич билан ўлчанаётгани акс этган суратлар тарқалди. Бу мактабдаги тартиб-қоида бўйича ўғил болаларнинг сочи узунлиги 2-3 сантиметрдан ошмаслиги керак экан. Фотосуратлар дарҳол тарқалиб, омма эътирози ва истеҳзосини қўзғади.
Воқеа, ҳатто, Иккинчи жаҳон урушида нацистларнинг асирлар юзи пропорсиясини ўлчаб, миллатини аниқлашига қиёсланди. Блогерлар олий раҳбарият кичик фарзандларининг ўсган сочда тушган фотосуратларини улашиб вазиятни савол остига олди. Ҳолатга халқ таълими вазири Шерзод Шерматов «Қош қўяман деб, кўз чиқариш», дея таъриф бериб, ҳеч қайси топшириқда болаларнинг сочини чизғичда ўлчаб, расмга олиб, Telegram’да тарқатиш керак деб ёзилмаганини эслатди.
«Дарё» янгиликларини кузатиб боринг. Ўзбекистон ва дунё хабарларидан энг биринчи хабардор бўлинг.
Изоҳ (0)