Тошкент шаҳри Шайхонтоҳур туманидаги «Шайх Зайниддин» жоме масжиди имом-хатиби Яҳё Абдураҳмонов 19 ноябрь куни «Вақф» хайрия жамоат фонди бошқарув кенгаши раиси вазифасига тайинланди, дея хабар қилмоқда Ўзбекистон мусулмонлари идораси матбуот хизмати.
Тайинлов ҳақда «Вақф» хайрия жамоат фонди васийлик кенгаши йиғилишида эълон қилинган. Фонднинг аввалги раҳбари Искандар Ҳалилов бошқа ишга ўтказилган.
Яҳё Абдураҳмонов 1985 йилда Сирдарё вилоятида туғилган. 1999–2003 йилларда Бухоро шаҳридаги Мир Араб мадрасасини тамомлаган. 2004–2008 йилларда Тошкент ислом институтида таълим олган. Шу давр оралиғида Мисрдаги Ал-Азҳар университетида малака оширган.
У 2009–2011 йилларда Ўзбекистон миллий университетининг Олий журналистика факультетида ўқиган. 2004–2018 йилларда Тошкент шаҳри Юнусобод тумани «Кулол қўрғон» жоме масжидида имом ноиби, имом-хатиби вазифаларида меҳнат қилган. 2018 йилда Тошкент шаҳридаги туманлараро қорилар мусобақасининг мутлақ ғолиби, шаҳар бўйича 2-ўрин соҳиби бўлган.
Яҳё Абдураҳмонов айни вақтда Тошкент шаҳри Шайхонтоҳур тумани бош имом-хатиби, ушбу тумандаги «Шайх Зайниддин» жоме масжиди имом-хатиби, Тошкент ислом институти тажвид фани ўқитувчиси ва Халқаро ислом академиясининг мустақил тадқиқотчиси ҳисобланади.
Аввалроқ Ўзбекистонда Ҳаж ва Умра зиёратини ташкил этишда расман монополия ўрнатиш таклиф қилинаётгани ҳамда Муфтий Усмонхон Алимов дунёнинг энг нуфузли мусулмонлари рўйхатидан ўрин олгани ҳақида хабар берилганди.
Изоҳ (0)