Америкалик бизнесмен Илон Маскнинг Neuralink нейротехнология компанияси мия имплантларини ўрнатиш бўйича клиник синовлар учун кўнгиллиларни жалб қилишни бошлади. Бу ҳақда Neuralink сайтида хабар берилди.
Тахминан 6 йил давом этаётган тадқиқот инсон миясининг ҳаракатга масъул бўлган қисмига R1 жарроҳлик роботидан фойдаланган ҳолда мия-компьютер интерфейсини (BCI) ўрнатишни назарда тутади. Компания ўзининг биринчи синови учун орқа миянинг бўйин қисми шикастланиши туфайли фалаж бўлган ёки латерал амиотрофик склерозга чалинган беморларни танламоқда.
Синовда имплант ва уни ўрнатадиган жарроҳлик роботининг хавфсизлиги, фалаж одамларга ташқи қурилмаларни ўз фикрлари билан бошқаришга имкон берувчи BCI чипининг самараси баҳоланади. Робот жарроҳлик йўли билан ултраюпқа ва эгилувчан имплант ипларини миянинг ҳаракатланишга масъул қисмига жойлаштиради.
Имплантация қилинадиган чип мия сигналларини симсиз равишда дастурга узатади, у орқали одамнинг ҳаракатланиш мақсади маълум бўлади.
Нуэралинк қандай компания?
Neuralink ташқи қурилмаларни фикр кучи билан бошқаришга ёрдам берадиган микрочип ишлаб чиқмоқда. У фалаж одамларнинг миясига ўрнатилганда уларга турли ҳаракатларни бажаришга ёрдам бериши керак. Компания ҳайвонлар устида кўплаб тажрибалар ўтказган. Neuralink декабрь ойида ҳайвонларга нисбатан шафқатсизликда айбланган, унга қарши терговни бошланганди.
Изоҳ (0)