Илон Маскнинг мияга имплантация қилинадиган чипларни ишлаб чиқарувчи Neuralink компанияси АҚШда ҳайвонларга нисбатан шафқатсиз муносабатда бўлгани учун тергов қилинмоқда. Бу ҳақда Reuters хабар бермоқда.
Текширув федерал прокурор томонидан бошланган ва уни АҚШ Қишлоқ хўжалиги департаменти бош инспектори бошқармоқда, — деди икки агентлик манбаси.
Корхона фаолиятини текширишга компания ходимларининг шикоятлари сабаб бўлган.
Reuters агентлигининг ёзишича, компания ходимлари ҳайвонлар устида синовлар шошқалоқлик билан ўтказилади, бу эса уларнинг азобланиши ва ўлимига олиб келади, деб ҳисоблайди.
Reuters ўнлаб Neuralink ҳужжатларини, жумладан, аудиоёзувлар, электрон почта хабарлари, тақдимотлар ва ҳисоботларни қўлга киритди. Агентлик, шунингдек, компаниянинг 20 дан ортиқ амалдаги ва собиқ ходимлари билан ҳам суҳбатлашди.
Улар муваффақиятсиз тажрибалар қайта-қайта такрорлангани учун синовдан ўтказилган ва ўлдирилган ҳайвонлар сони кўпайганини айтди.
Маълумотларга кўра, 2018 йилдан буён тажрибалар давомида 1,5 мингга яқин ҳайвонлар, жумладан, қўйлар, чўчқалар ва маймунлар ўлдирилган.
Материалда таъкидланишича, бу маълумотларнинг ўзи Neuralink ҳеч қандай қоидани бузганлигини кўрсатмайди — кўплаб компаниялар тадқиқотда ҳайвонлардан фойдаланади ва синов охирида уларни ўлдиради.
Аввалроқ Илон Маск 6 ойдан кейин одамлар миясига чип ўрнатиш бошланишини маълум қилгани ҳақида хабар берилганди.
Изоҳ (0)