Қирғизистон ўзининг зирҳли техникасини ишлаб чиқаришни йўлга қўйиши мумкин

Қирғизистоннинг “Белес” компанияси маҳаллий зирҳли машиналар ишлаб чиқаришга қизиқиш билдирмоқда. Бу ҳақда компания раҳбари Мирбек Аскалиев Facebook’даги саҳифасида маълум қилди.

У мамлакат олий раҳбариятига махсус мақсадлар учун зирҳли машиналар ишлаб чиқариш бўйича ҳукумат шартномасини тузиш имкониятини кўриб чиқиш илтимоси билан мурожаат қилди.

Аскалиевнинг таъкидлашича, сўнгги йилларда зирҳли машиналарга бўлган талаб глобал вазиятдан келиб чиқиб барқарор ошиб бормоқда. Уларни ишлаб чиқариш билан шуғулланадиган заводларга кўплаб буюртмалар тушади. Ўз навбатида, бундай машиналар нархи ҳам ошмоқда.

Натижада ушбу транспорт воситаларини ишлаб чиқарадиган баъзи давлатлар уларни хорижга экспорт қилишга чекловлар киритмоқда.

Шу муносабат билан, Қирғизистоннинг “Белес” компанияси давлат кўмагида зирҳли техника ишлаб чиқаришга қизиқиш билдирган. Мирбек Аскалиев компания уч йилдан буён зирҳли техника дизайни устида фаол иш олиб бораётганини таъкидлади. У президент Садир Жапаров, Миллий хавфсизлик давлат қўмитаси раҳбари Қамчибек Ташиев ва Вазирлар Маҳкамаси раиси Оқилбек Жапаровга махсус автомобиль техникасини ишлаб чиқариш бўйича давлат шартномасини тузиш имконияти ҳақида сўров билан чиқди.

“Уч йиллик қизғин ишлардан сўнг B6/B7 тоифали зирҳли транспорт воситаларини (4-даражали зирҳли) яратиш учун зарур бутловчи қисмлар етказиб берувчилар билан тузган келишувларимиз якунига етди. Компаниямиз ҳозирда қийинчиликларни бошдан кечирмоқда. Аммо, агар давлат биз билан шартнома тузса, биз Россия ва Хитойда ишлаб чиқарилган сифат жиҳатидан кам бўлмаган зирҳли транспорт воситаларини ишлаб чиқаришга тайёр эканимизни ишонч билан билдирамиз”, — дея таъкидлади Аскалиев.