Ўзбекистон Давлат хавфсизлик хизмати Тожикистон ва Қирғизистондан контрабанда йўли билан келтирилган гиёҳвандлик воситаларини аниқлаб, ноқонуний савдони амалга ошираётганларни қўлга олди.
ДХХнинг Фарғона вилояти бўйича бошқармаси ходимлари томонидан ўтказилган тезкор-қидирув тадбирлари доирасида, Тошлоқ туманида яшовчи, 2006 йилда туғилган шахс яшаш хонадони кўздан кечирилган.
Натижада, ушбу манзилда келгусида сотиш мақсадида сақлаб келинаётган 27 кило 573 грамм гашиш ва 3 кило 967 грамм опий гиёҳвандлик воситалари борлиги аниқланиб, просессуал тартибда расмийлаштириб олинган. Аниқланишича, ушбу наркотик моддалар Тожикистондан контрабанда йўли билан олиб келинган.
Бу йўналишда ДХХнинг Андижон вилояти бўйича бошқармаси ходимлари томонидан ҳам вилоят божхона бошқармаси билан ҳамкорликда тезкор тадбирлар ўтказилган.
Хусусан, Андижон вилоятининг Қўрғонтепа туманида яшовчи, 1986 йилда туғилган фуқаро Қирғизистоннинг Ўш вилоятида истиқомат қилувчи, 1984 йилда туғилган шахс билан ўзаро тил бириктириб, 1 кило 806 грамм мефедрон синтетик гиёҳвандлик воситасини харидорга 80 минг АҚШ долларига сотаётган вақтларида қўлга олинган.
Шунингдек, тезкор тадбир давом эттирилиб, Қўрғонтепа туманида яшовчи фуқаронинг уйидан ҳам 2 кило 698 грамм мефедрон моддаси тегишли тартибда расмийлаштириб олинган. Ушбу синтетик наркотик моддалар Қирғизистонда олиб келинган.
Ҳозирда ушбу ҳолатлар юзасидан мазкур шахсларга нисбатан Жиноят кодексининг тегишли моддалари билан жиноят ишлари қўзғатилиб, тергов ҳаракатлари олиб борилмоқда.
Изоҳ (0)