“Циклодол” дори воситасини беморларга маълум миқдорда берилаётгани юзасидан расмий муносабат билдирилди

“Дори-Дармон” акциядорлик компанияси Андижон вилоятидаги дорихонада, рецепт асосида бериладиган “Циклодол” дори воситасини беморларга маълум миқдорда берилаётгани ҳақидаги ижтимоий тармоқларда тарқалган хабарлар юзасидан расмий муносабат билдирди.

Қайд этилишича, “Циклодол” (Халқаро патентланмаган номи: “Тригексифенидил”) дори воситаси паркинсонизм касаллиги билан касалланган беморларга буюрилади. “Дори-Дармон” акциядорлик компанияси тизимидаги “Ўзбекистон дори таъминоти” МЧЖ компания тизимидаги жамиятларни рецепт асосида бериладиган дори воситалари билан таъминлайди. 

“Ўзбекистон Дори таъминоти” МЧЖ омборхонасида “Циклодол Гриндекс 2 мг таб №50” (Латвия “Гриндекс” АЖ) дори воситаси мавжуд бўлиб, “Андижон Дори-Дармон” АЖ томонидан ҳозирда мазкур дори воситаларини беморларга етказиш чоралари кўриляпти.

Шунингдек, айни кунларда “Циклодол Гриндекс 2 мг таб №50” дори воситасининг янги партияси компания божхона омборига келтирилган ҳамда белгиланган тартибда сертификациядан ўтказиш ишлари амалга ошириляпти.

Паркинсонизм касаллигини даволашда қўлланадиган бу дори воситаси Ўзбекистонга асосан импорт асосида олиб келинади, шунингдек, маҳаллий ишлаб чиқарувчи Neoгаленpharm МЧЖ томонидан “Тригексифенидил 5мг №50” савдо номи билан ишлаб чиқарилади.

Маълумот учун, “Циклодол” (Тригексифенидил) психотроп дори воситаси Вазирлар Маҳкамасининг “Гиёҳвандлик воситалари, психотроп моддалар ва прекурсорларни Ўзбекистон ҳудудига олиб кириш, ундан олиб чиқиш ва транзит тарзида ўтказиш тартиби тўғрисида”ги қарори билан тасдиқланган 3-рўйхат, яъни Ўзбекистонда муомаласи чекланган психотроп дори воситалари рўйхатига киритилган. 

Мазкур дори воситасини реализация қилиш гиёҳвандлик воситалари ва психотроп моддаларни сақлаш ва реализация қилиш (бериш) фаолиятига лицензияси мавжуд бўлган дорихоналар томонидан амалга оширилади.